Корхонаи тухмипарварии ноҳияи Файзобод ба кишоварзон 400 тонна тухмиҳои гуногуни картошка пешниҳод намуд

ДУШАНБЕ, 18.06.2025. /АМИТ «Ховар»/. Корхонаи воҳиди давлатии тухмипарварии ба номи Абдулвоҳид Назирови ноҳияи Файзобод имсол дар 320 гектар заминҳои корами обӣ кишти зироати гуногун гузаронида аст, ки 164 гектари онро картошка ташкил медиҳад.

Директори Корхонаи воҳиди давлатии тухмипарварӣ Иномҷон Шарипов ба хабарнигори АМИТ «Ховар» иброз дошт, ки корхона соли равон ба сокинони ноҳия ва минтақаҳои гуногуни мамлакат 400 тонна тухмиҳои гуногуни картошка пешниҳод намуд.

«Аз сабаби оне, ки ҳавои ин минтақа барои истеҳсоли картошка мувофиқ аст, корхонаи вазифадор аст картошкапарварони ноҳияи Файзобод ва шаҳру навоҳии мамлакатро бо тухмиҳои хушсифат таъмин намоянд»,-афзуд Иномҷон Шарипов.

Корхонаи воҳиди давлатии тухмипарварии ба номи Абдулвоҳид Назиров дорои 6951 гектар замин мебошад, ки аз ин 320 гектар замини корами обӣ, 118 гектар замини корами лалмӣ, 820 гектар замини зери боғ, 4723 гектар замини чарогоҳ ва 762 гектар дигар заминҳоро ташкил медиҳад. 1486 нафар сокинони ноҳия бо корхона шартнома баста, дар ин заминҳо ба ҳайси иҷоракор ба парвариши маҳсулоти кишоварзӣ машғул мебошанд.

Имсол Корхонаи воҳиди давлатии тухмипарварии ба номи Абдулвоҳид Назиров ва иҷоракорони он навъҳои картошаи «Эвалюшен», «Аладин» ва картошкаи сурхи дупӯстаю сафеди Покистонро кишт намуданд, ки онҳо ба боду ҳавои минтақа мувофиқ буда, ҳосили фаровон медиҳанд.

Соли 2024-2025 Корхонаи воҳиди давлатии тухмипарварии ба номи Абдулвоҳид Назиров дар якҷоягӣ бо иҷоракорон наздики се ҳазор тонна картошка истеҳсол ва содирот намуданд.

АКС: АМИТ «Ховар»