Сироҷиддин Муҳриддин ширкатҳои иштирокдори Шурои соҳибкорони Осиёи Марказӣ ва Ҳиндустонро ба Душанбе даъват намуд

ДУШАНБЕ, 07.06.2025 /АМИТ «Ховар»/. Дар шаҳри Ню-Деҳлӣ дар ҳошияи ҷаласаи чоруми Муколамаи «Осиёи Марказӣ – Ҳиндустон», Шурои соҳибкорон бо иштироки вазирони корҳои хориҷии кишварҳои иштирокчӣ баргузор гардид. Дар ин хусус АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Вазири корҳои хориҷии Ҷумҳурии Тоҷикистон Сироҷиддин Муҳриддин зимни суханронии худ таъкид намуд, ки ҳамкории Тоҷикистону Ҳиндустон бо такя ба манфиатҳои мутақобилан судманд дар соҳаҳои тиҷорат, сармоягузорӣ, тандурустӣ, маориф, фарҳанг ва саноат таҳким меёбанд.

Дар идома, Сироҷиддин Муҳриддин ширкатҳои ҳиндиро барои иштирок дар Шурои байналмилалии нассоҷӣ, ки 8–10 июли соли 2025 дар шаҳри Душанбе баргузор мешавад, даъват намуд. Ин чорабинӣ ба густариши бештари ҳамкории саноатии ду кишвар мусоидат хоҳад кард.

Ҳамчунин, таваҷҷуҳи махсус ба густариши ҳамкорӣ дар бахшҳои рақамикунонӣ, технологияҳои иттилоотӣ, зеҳни сунъӣ ва таҳкими робитаҳои фарҳангиву гуманитарӣ равона гардид.

Ҷонибҳо ба рушди ҳамкории иқтисодиву тиҷоратӣ, таъсиси марказҳои муштараки логистикӣ ва соддагардонии расмиёти гумрукӣ ва транзитӣ таваҷҷуҳи махсус зоҳир намуданд.

Дар робита ба густариши инфрасохтори нақлиётӣ, ҷонибҳо долонҳои муҳими минтақавӣ, аз ҷумла бандари Чобаҳор ва долони «Шимол – Ҷануб»-ро ҳамчун самтҳои афзалиятноки ҳамкорӣ арзёбӣ карданд.

Муколама бозгӯи иродаи қавии кишварҳои Осиёи Марказӣ ва Ҳиндустон ҷиҳати таҳкими ҳамкории бисёрҷанба ва мусоидат ба субот ва рушди устувори минтақа мебошад.

АКС: Вазорати корҳои хориҷии Ҷумҳурии Тоҷикистон