Таҳти унвони «Эмомалӣ Раҳмон — ҳомии сулҳ ва Ваҳдати миллӣ» конференсияи ҷумҳуриявӣ доир шуд

ДУШАНБЕ, 17.06.2025. /АМИТ «Ховар»/. Дар Академияи идоракунии давлатии назди Президенти Ҷумҳурии Тоҷикистон Конференсияи илмӣ — амалии ҷумҳуриявӣ таҳти унвони «Эмомалӣ Раҳмон — ҳомии сулҳ ва Ваҳдати миллӣ» баргузор шуд. Дар ин хусус ба АМИТ «Ховар» аз Академияи идоракунии давлатӣ хабар доданд.

Ректори Академияи идоракунии давлатӣ Даврон Сафарзода иброз намуд, ки Сарвари давлат муҳтарам Эмомалӣ Раҳмон дар баробари таҳкими сохторҳои давлатӣ ба густариши худшиносии миллӣ ва ҳифзи арзишҳои маънавии миллат аҳамияти аввалиндараҷа доданд.

«Сиёсати дурбинонаи Президенти мамлакат муҳтарам Эмомалӣ Раҳмон дар даврони соҳибистиқлолӣ ба эҳёи анъанаҳо, забон, таърих, фарҳанг ва арзишҳои миллӣ равона гардид. Маҳз бо ибтикори Сарвари давлат ҷашнҳои миллӣ, аз ҷумла Рӯзи Ваҳдати миллӣ бо шукуҳу шаҳомати хос таҷлил мешаванд, ки ба таҳкими ҳисси ифтихори миллӣ ва ҳамбастагии умумимиллӣ мусоидат менамояд», — афзуд Даврон Сафарзода.

Иброз гардид, ки таҷрибаи беназири сулҳофаринии Тоҷикистон имрӯз ҳамчун намунаи нодири ҳаллу фасли буҳрони дохилӣ тавассути гуфтугӯ ва ризоияти миллӣ эътироф шудааст.

Баён гардид, ки 27 июн — Рӯзи Ваҳдати миллӣ ҳамчун рамзи муттаҳидии миллат, руҳияи таҳаммул ва эҳтироми тарафайн дар таърихи давлатдории навини тоҷикон сабт гардидааст.

АКС: Академияи идоракунии давлатии назди Президенти Ҷумҳурии Тоҷикистон