Ҳаҷми гардиши мутақобили мол байни Тоҷикистон ва Амороти Муттаҳидаи Араб беш аз 2 баробар афзудааст
ДУШАНБЕ, 16.07.2025 /АМИТ «Ховар»/. Ҳаҷми гардиши мутақобили мол байни Ҷумҳурии Тоҷикистон ва Амороти Муттаҳидаи Араб дар шаш моҳи аввали соли равон беш аз 2 баробар афзудааст. Дар ин хусус имрӯз зимни вохӯрии Вазири рушди иқтисод ва савдо Завқӣ Завқизода бо Вазири иқтисод ва сайёҳии Амороти Муттаҳидаи Араб Абдулло ибни Тавқ Ал-Маррӣ иттилоъ дода шуд.
Завқӣ Завқизода иброз намуд, ки бо шарофати сиёсати хирадмандонаи сарони ҳарду давлат- Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Президенти Амороти Муттаҳидаи Араб муҳтарам Шайх Муҳаммад бин Зоид Оли Наҳён муносибатҳои дуҷониба ба сатҳи баланд баромаданд.
Дар вохӯрӣ ҷонибҳо зарурати тавсеаи тиҷорати дутарафаро таъкид намуда, ба мувофиқа расиданд, ки имконоти истифоданашударо дар соҳаҳои саноат, энергияи «сабз», кишоварзӣ, авиатсия, сайёҳӣ ва логистика пурра истифода намоянд.
Завқӣ Завқизода аз ҷониби Амороти Муттаҳидаи Араб хоҳиш намуд, ки ширкатҳои аморатӣ дар соҳаҳои афзалиятноки иқтисоди миллӣ, аз ҷумла рақамикунонӣ, саноати коркард, истихроҷ, инфрасохтор, логистика ва туризм лоиҳаҳои сармоягузорӣ татбиқ намоянд.
Бо назардошти аҳамияти энергияи «сабз» Завқӣ Завқизода иштироки Фонди рушди Абузабиро дар сохтмони Неругоҳи барқи обии «Роғун» муҳим арзёбӣ намуда, даъват ба амал овард, ки барои ҳарчи зудтар баимзорасонии созишномаи сармоягузорӣ раванди мувофиқа ва омодасозии ҳуҷҷатҳои зарурӣ тезонида шавад.
Дар посух ба ин пешниҳод ҷониби Амороти Муттаҳидаи Араб иброз дошт, ки Тоҷикистонро ҳамчун шарики боэътимод ва дорои дурнамои васеи ҳамкории иқтисодӣ дар минтақа арзёбӣ менамояд ва омодааст барои баррасии пешниҳодҳо ва густариши ҳамкорӣ, аз ҷумла ҷалби бештари сармояи Аморот ба соҳаҳои афзалиятнок мусоидат намояд.
Бояд гуфт, ки дар доираи сафари расмии Вазири иқтисод ва сайёҳии Амороти Муттаҳидаи Араб пагоҳ бо иштироки доираҳои соҳибкорони тоҷик ва аморотӣ Форуми иқтисодӣ, сармоягузорӣ ва сайёҳӣ баргузор мегардад.
АКС: Вазорати рушди иқтисод ва савдои Ҷумҳурии Тоҷикистон
Дар ноҳияҳои Тоҷикобод ва Лахш оид ба пешгирии амалҳои коррупсионӣ вохӯриҳо баргузор шуданд
Тоҷикистон ва Қатар ҳамкориро дар самти фаъолияти хайриявӣ ва башардӯстона тақвият медиҳанд
Форум оид ба алоқаи мобилии насли панҷум– 5G баргузор шуд
СТРАТЕГИЯИ РУШДИ ИҚТИСОДИ «САБЗ». Дар доираи амали он беш аз 500 ҳазор ҳисобкунаки электронии барқ насб гардидааст
Ҷаласаи навбатии Шурои ҷамъиятиву машваратӣ доир ба фаъолияти гумрукӣ баргузор шуд
Кишоварзони Ваҳдат имсол ҳаҷми умумии маҳсулотро ба беш аз 1 миллиарду 689 миллион сомонӣ расониданд
Дар Душанбе Форум оид ба алоқаи мобилии насли панҷум–5G баргузор мегардад
Дар Душанбе ҷаласаи 48-уми Шурои маъмурии Ташкилоти патентии Авруосиё доир шуд
Ҷаласаи 20 – уми Комиссияи байниҳукуматии Тоҷикистону Қазоқистон оид ба ҳамкории иқтисодӣ баргузор мешавад
Дар ноҳияи Мастчоҳ ҷамъоварии ҳосил ва кишти тирамоҳӣ идома дорад
Дар Тоҷикистон истеҳсоли моҳӣ беш аз 5 фоиз зиёд шудааст
ЗАНБӮРИАСАЛПАРВАРӢ. Занбӯрҳо гардолудкунандаи асосии растаниҳо ва дарахтони мевадор мебошанд
