Дар Хоруғ Форуми байналмилалии сармоягузории «Помиринвест -2025» баргузор мешавад

ДУШАНБЕ, 04.07.2025 /АМИТ «Ховар»/. 24-26 июли соли равон дар шаҳри Хоруғи Вилояти Мухтори Кӯҳистони Бадахшон баргузории Форуми байналмилалии сармоягузории «Помиринвест-2025» дар назар дошта шудааст. Дар ин хусус АМИТ «Ховар» бо истинод ба Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ медиҳад.

Тибқи барномаи форум, пеш аз оғози Форуми байналмилалии сармоягузории «Помиринвест -2025» дар назди Чойхонаи миллии шаҳри Хоруғ намоишгоҳи молу маҳсулоти маҳаллии Вилояти Мухтори Кӯҳистони Бадахшон баргузор мегардад.

Дар форум навори видеоӣ дар мавзӯи «Имкониятҳои сармоягузорӣ ва сайёҳии Вилояти Мухтори Кӯҳистони Бадахшон» пешниҳоди иштирокдорон мешавад.

Мусоидат ба ҷалби сармояи дохилию хориҷӣ ба рушди соҳибкорӣ, хусусан дар бахши сайёҳӣ ва инфрасохтори он, ба роҳ мондани робитаҳои тиҷоратию иқтисодӣ бо дигар минтақаҳои мамлакат ва давлатҳои ҳамҷавор, татбиқи барномаҳои рушди иҷтимоию иқтисодӣ дар Бадахшон, истифодаи самараноки имкониятхо ва сарватҳои табиии Вилояти Мухтори Кӯҳистони Бадахшони аз ҳадафҳои асосии Форуми «Помиринвест-2025» маҳсуб меёбад.

АКС аз манбаъҳои боз