Дар Тоҷикистон беш аз 34 ҳазор нақлиёти барқӣ ба қайд гирифта шуд

ДУШАНБЕ, 22.07.2025 /АМИТ «Ховар»/. Шумораи умумии нақлиёти барқӣ дар Тоҷикистон то 1 июни соли 2025 ба 34 ҳазору 354 адад расид. Дар ин хусус ба АМИТ «Ховар» аз Вазорати нақлиёти Ҷумҳурии Тоҷикистон хабар доданд.

Бояд гуфт, ки дар мамлакат «Барномаи рушди нақлиёти барқӣ дар Ҷумҳурии Тоҷикистон барои солҳои 2023–2028» қабул гардидааст. Дар доираи ин барнома якчанд тадбирҳо, аз ҷумла таъсиси пойгоҳ барои истеҳсоли мошинҳои барқӣ ва ҷузъҳои онҳо, бунёди инфрасохтор барои таъмини барқ ва нигоҳдории мошинҳои барқӣ, таҳияи технологияи истифодаи батареяҳо, додани имтиёзҳои иловагӣ ва дигар имтиёзҳо ба ронандагони нақлиёти барқӣ ва ташаккули маҷмуи тадбирҳо оид ба ҳавасмандгардонии рушди нақлиёти барқӣ пешбинӣ шудааст.

Инчунин Тоҷикистон ният дорад, ки дар ҳамкорӣ бо ширкатҳои чинӣ мошинҳои барқӣ истеҳсол намояд. Бо мақсади дастгирии рушди нақлиёти барқӣ дар Тоҷикистон, ба мисли дигар давлатҳо баъзе имтиёзҳо амалӣ карда шудаанд. Аз ҷумла, бо қарори Ҳукумати Ҷумҳурии Тоҷикистон аз 2 августи соли 2023 ба мамлакат ворид намудани воситаҳои нақлиёти истеҳсолашон то соли 2013 (мавқеи молии 8702, 8703, 8704 ва 8705, Номгӯи молии фаъолияти иқтисодии хориҷии Ҷумҳурии Тоҷикистон) манъ карда шуда, тибқи таҳрири нави Кодекси андози Тоҷикистон, ки моҳи марти соли 2022 қабул шудааст, воридоти мошинҳои барқӣ ба муҳлати 10 сол аз пардохти андоз ва боҷи гумрукӣ озод аст.

Ёдовар мешавем, ки тибқи маълумоти Хадамоти гумруки назди Ҳукумати Ҷумҳурии Тоҷикистон, соли 2024 ба мамлакат 17 695 мошини барқӣ ворид гардид. Дар панҷ моҳи аввали соли 2025 беш аз 12 821 мошини нави барқӣ ворид карда шуд. Шумораи умумии нақлиёти барқӣ дар Тоҷикистон то 1 июни ҳамин сол 34  354 ададро ташкил дод.

АКС аз манбаъҳои боз