Гурӯҳи корӣ бо рафти корҳои сохтмонии манзилҳои аз офати табиӣ зарардидаи ноҳияҳои Рашт ва Тоҷикобод шинос гардид

ДУШАНБЕ, 03.07.2025. /АМИТ «Ховар»/. 1 июли соли равон гурӯҳи корӣ таҳти роҳбарии Раиси Кумитаи меъморӣ ва сохтмони назди Ҳукумати Ҷумҳурии Тоҷикистон Низом Мирзозода бо ҷараёни корҳои сохтмонии иншоот ва манзилҳои навбунёди аз офати табиӣ зарардидаи ноҳияҳои Рашт ва Тоҷикобод шинос шуд. Дар ин хусус ба АМИТ «Ховар» аз Кумитаи меъморӣ ва сохтмон хабар доданд.

Зимни шиносоӣ сохтмончиён ва масъулин ҷиҳати бо сатҳу сифати баланд ва дар муҳлати муайяншуда ба анҷом расонидани корҳои сохтмонии иншоот, аз ҷумла мактаб, бунгоҳҳои тиббӣ таъкид гардиданд. Масъалаи омодагӣ ҷиҳати ба истифода додани манзилҳои нави истиқоматӣ ба зарардидагон низ мавриди баррасӣ қарор дода шуд.

Ёдовар мешавем, ки 13 апрел, соати 09:24 дар ҳудуди Ҷумҳурии Тоҷикистон заминларза ба амал омад. Қувваи ларзиши замин дар марказаш, ки дар километри 160-уми самти шимолу шарқ аз шаҳри Душанбе ва километри 21-уми самти шарқ аз маркази ноҳияи Рашт қарор дошт, 5-6 балл ва дар шаҳри Душанбе 3 баллро ташкил дод. Бар асари заминларза дар ноҳияҳои Рашт 34 хонаи истиқоматӣ пурра вайрон шуда, 72 хона қисман зарар дида, ба 89 хонаи дигар осеби сабук ва ба 65 иншооти ёрирасон зарар расидааст.

АКС: Кумитаи меъморӣ ва сохтмони назди Ҳукумати Ҷумҳурии Тоҷикистон