МегаФон Тоҷикистон ва Федератсияи футболи Тоҷикистон ба рушд додани варзиш дар ҷумҳурӣ идома медиҳанд

ДУШАНБЕ, 30.07.2025 /АМИТ «Ховар»/. Имрӯз дар Душанбе ширкати «МегаФон Тоҷикистон» ва Федератсияи футболи Тоҷикистон Созишнома оид ба ҳамкории стратегӣ имзо намуданд, ки он ба дастгирӣ ва рушди футбол нигаронида шудааст.

Ба ташкили чорабиниҳо шарикон ду сол пайи ҳам машғул ҳастанд. Яке аз лоиҳаҳои амалигардида мусобиқаи кӯдаконаи «МегаФон Life бо сабки футбол» буд, ки дар доираи он зиёда аз 400 мусобиқа дар шаҳрҳои калонтарини ҷумҳурӣ –Душанбе, Бохтар, Ваҳдат, Ҳисор, Истаравшан, Кӯлоб, Хоруғ ва Хуҷанд, инчунин дар ноҳияҳои Файзобод ва Шаҳринав баргузор карда шуданд. Дар мусобиқаҳо қариб 3 400 кӯдак аз 216 даста иштирок намуданд. Аз ҳама зиёд бозингарон дар мусобиқаҳои шаҳри Душанбе ва Истаравшан ҷамъ омаданд, ки шумораи умумии онҳо 460 нафарро ташкил дод.

Мувофиқи ҳуҷҷати нав, ки зери он директори генералии ширкати «МегаФон Тоҷикистон» Анатолий Изюмников ва муовини президенти Федератсияи футболи Тоҷикистон Искандар Ҷалилов имзо гузоштанд, тарафҳо ташкилкунии якчанд чорабиниҳои варзиширо ба нақша гирифтаанд.

Дар қатори онҳо – мусобиқа оид ба футзал, силсилаи фестивалҳои футбол дар тамоми мамлакат, мусобиқаи «МегаФон U12» дар шаҳри Душанбе мебошанд. Дар баробари ин чорабиниҳо оид ба дастгирии дастаи мунтахаби миллии Ҷумҳурии Тоҷикистон ва сафари дастаи мунтахаби наврасони ҷумҳурӣ ба чемпионати ҷаҳони U16 дар Қатар ба нақша гирифта шудааст.

«Мо аз идомаи ҳамкорӣ бо Федератсияи футболи Тоҷикистон хушҳол ҳастем. Лоиҳаҳои муштараки мо нишони онанд, ки тиҷорат ва варзиш барои кори умумӣ – тарбияи насли нави футболбозон ва пешбурди тарзи ҳаёти фаъол воқеан муттаҳид шуда метавонанд. Ҳамин тавр, тирамоҳи соли гузашта ҳазорҳо сокинони Душанбе дар мусобиқаи нодир, ки бо иштироки ситораҳои футбол, шоу-бизнес ва Instagram доир гардида буд, иштирок намуданд. Мутмаинам, ки дар пеш моро ташаббусҳои боз ҳам барҷаста, ки ба рушди футбол равона гардида, ҷавононро дар саросари ҷумҳурӣ ҳавасманд менамоянд, мунтазир хоҳанд буд!», -иброз намуд директори генералии ширкати «МегаФон Тоҷикистон» Анатолий Изюмников.

Муовини президенти Федератсияи футболи Тоҷикистон Искандар Ҷалилов гуфт, ки «дастгирии ширкати «МегаФон Тоҷикистон» барои амалигардонии вазифаҳои мо дар самти рушди футболи оммавӣ ва кӯдакона хеле муҳим аст. Ин на танҳо муносибатҳои шарикона, балки қадами устувор сӯи ояндаест, ки дар он ҳар кӯдак барои баромадан ба майдони футбол ва санҷидани қувваи худ имконият пайдо менамояд».

АКС: ширкати МегаФон Тоҷикистон