Тоҷикистон ва Муғулистон ҳамкориро дар самти пешгирӣ ва бартарафнамоии ҳолатҳои фавқулода таҳким мебахшанд

ДУШАНБЕ, 24.07.2025 /АМИТ «Ховар»/. Имрӯз дар доираи сафари давлатии Президенти Муғулистон Ухнаагийн Хурэлсух ба Ҷумҳурии Тоҷикистон ва пас аз мулоқоту музокироти сатҳи олӣ байни Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ва Агентии давлатӣ оид ба ҳолатҳои фавқулодаи Муғулистон дар самти пешгирӣ ва бартараф кардани ҳолатҳои фавқулода Ёддошти тафоҳум ба имзо расид.

Тавре аз Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба АМИТ «Ховар» хабар доданд, ҳадафи асосии Ёддошти тафоҳум густариш додани табодули таҷриба дар самти идоракунии ҳолатҳои фавқулодаи дорои хусусияти табиӣ ва техногенӣ, коҳиш додани хавфи офатҳои табиӣ, табодули таҷриба оид ба таъмини алоқа, огоҳсозии иттилоотии аҳолӣ ҳангоми сар задани ҳолатҳои фавқулода ва системаи огоҳсозӣ, табодули технологияи нав, такмили дониши кормандон тавассути даврҳои омӯзишӣ, конференсияҳо ва вохӯриҳои судманд мебошад.

Дар доираи Ёддошти тафоҳум фаъолияти соҳа дар сатҳи минтақавию байналмилалӣ таҳким меёбад.

АКС: Хадамоти матбуоти Президенти Ҷумҳурии Тоҷикистон/АМИТ «Ховар