Тоҷикистон ва ЮНИСЕФ дар Ню-Йорк оид ба ҳуқуқи кӯдак ва инноватсия чорабинӣ доир намуданд

ДУШАНБЕ, 20.07.2025 /АМИТ «Ховар»/. 18 июл дар қароргоҳи ЮНИСЕФ дар шаҳри Ню-Йорк чорабинии сатҳи баланд таҳти унвони «Ҳуқуқи кӯдак ва инноватсия: имкониятҳо дар Тоҷикистон ва берун аз он» баргузор гардид. Чорабинӣ бо ташаббуси Намояндагии доимии Ҷумҳурии Тоҷикистон дар назди Созмони Милали Муттаҳид ва бо дастгирии ЮНИСЕФ баргузор шуда, ба масъалаҳои таҳкими ҳуқуқи кӯдакон тавассути истифодаи технологияҳои рақамӣ ва зеҳни сунъӣ бахшида шуд. Дар ин хусус ба АМИТ «Ховар» аз маркази матбуоти Вазорати маориф ва илми Ҷумҳурии Тоҷикистон хабар доданд.

Дар чорабинӣ намояндагони ЮНИСЕФ, давлатҳои аъзои Созмони Милали Муттаҳид, Шурои миллии зеҳни сунъии Тоҷикистон, коршиносони соҳаи маориф ва намояндагони ширкатҳои инноватсионӣ иштирок намуданд.

Намояндаи доимии Ҷумҳурии Тоҷикистон дар назди Созмони Милали Муттаҳид Ҷонибек Ҳикмат аҳаммияти чорабиниро дар таҳкими ҳуқуқи кӯдак тавассути навовариҳои рақамӣ ва зеҳни сунъӣ таъкид намуда, изҳор дошт, ки Тоҷикистон бо роҳнамоии Президенти Ҷумҳурии Тоҷикистон муҳтарам Эмомалӣ Раҳмон ҳамеша ба таъмини ҳуқуқу манфиатҳои кӯдакон ва фароҳамсозии шароити мусоид барои рушди онҳо афзалият медиҳад.

Дар идома директори шарикӣ бо ҷомеаи байналмилалӣ дар ЮНИСЕФ Мандип О’Брайен аз дастовардҳои муштараки Тоҷикистон ва ЮНИСЕФ дар самти ҳимояи ҳуқуқи кӯдакон ёдовар шуд.

Вазири маориф ва илми Ҷумҳурии Тоҷикистон Раҳим Саидзода дар мавзуи «Ҳуқуқи кӯдак ва дастовардҳои Тоҷикистон дар ин самт» сухан гуфта, изҳор намуд, ки дар партави сиёсати хирадмандонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҳимоя ва пуштибонии оила, модар ва кӯдак дар меҳвари сиёсати иҷтимоии давлат қарор дорад.

Таъкид карда шуд, ки дар Ҷумҳурии Тоҷикистон ҳуқуқи кӯдак дар сатҳи Конститутсия мустаҳкам гардида, тибқи моддаи 34-и он, модар ва кӯдак зери ҳимоя ва ғамхории махсуси давлат қарор доранд. Тарбияи кӯдакон дар муҳити оила, рушди ҳамаҷонибаи шахсият ва таъмини ҳифзи ҳуқуқу манфиатҳои ноболиғон ва аъзои ғайриқобили меҳнати оила, ҷузъи муҳимми сиёсати иҷтимоии Ҷумҳурии Тоҷикистон ба шумор меравад.

Аз нақши ЮНИСЕФ дар татбиқи Стратегияи миллии ҳифзи иҷтимоии аҳолӣ барои давраи то соли 2040, рушди барномаҳои рақамии таълимӣ ва дигар иқдомҳои муштарак низ ёдоварӣ карда шуд.

Бо қаноатмандӣ тазаккур дода шуд, ки ҷалби кӯдакон ба таҳсилоти томактабӣ дар даҳсолаи охир аз 12,3% (соли 2015) ба 23,7% (соли 2025) расида, бо ташаббус ва таваҷҷуҳи Президенти Ҷумҳурии Тоҷикистон муҳтарам Эмомалӣ Раҳмон дар панҷ соли оянда 800 муассисаи томактабӣ ва 1000 муассисаи таҳсилоти миёна бунёд мегардад.

Чорабинӣ Тоҷикистонро ҳамчун ҷониби фаъол ва ташаббускор дар истифодаи зеҳни сунъӣ ба манфиати иҷтимоӣ, бахусус дар самти маориф ва ҳифзи ҳуқуқи кӯдакон муаррифӣ намуда, фазои муносиб барои густариши ҳамкории байналмилалӣ, ҷалби бахши хусусӣ ва муаррифии таҷрибаи кишвар дар сатҳи ҷаҳонӣ фароҳам овард.

АКС: Маркази матбуоти Вазорати маориф ва илми Ҷумҳурии Тоҷикистон