Дар Бохтар ду майдончаи нави футбол мавриди истифода қарор гирифт

ДУШАНБЕ, 12.08.2025 /АМИТ «Ховар»/. Бо ташаббуси Президенти Федератсияи футболи Тоҷикистон Рустами Эмомалӣ дар шаҳри Бохтар ду майдончаи нави футболи хурд ба истифода дода шуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии вилояти Хатлон хабар медиҳад.

Майдонча бо таҷҳизоти муосири варзишӣ муҷаҳҳаз буда, дар он барои баргузории машғулияти гуногун, аз ҷумла бозии футбол ва дигар намудҳои машқҳои ҷисмонӣ шароити хуб фароҳам оварда шудааст.

Ин навгонии муҳими инфрасохторӣ боиси қаноатмандии сокинони шаҳр гардида, ҷавонписарон ва наврасон онро чун имконияти арзишманд барои рушди маҳорати варзишӣ арзёбӣ менамоянд.

Бунёди чунин майдончаҳо дар гӯшаву канори вилояти Хатлон имкон медиҳад, ки шумораи ҷавонони фаъол дар чорабиниҳои варзишӣ афзоиш ёфта, сатҳи иштироки онҳо дар мусобиқаҳои ноҳиявӣ ва минтақавӣ боло равад.

Раиси вилоят зимни мулоқот бо ҷавонону наврасон таъкид намуд, ки машғул шудан бо варзиш на танҳо барои солимии ҷисмонӣ, балки барои пешгирии гаравидан ба ҳар гуна гурӯҳҳои ифротӣ низ муҳим мебошад.

АКС: Мақомоти иҷроияи ҳокимияти давлатии вилояти Хатлон