Дар Донишгоҳи техникии Тоҷикистон Чемпионати ҷаҳонии касбӣ баргузор гардид

ДУШАНБЕ, 28.08.2025 /АМИТ «Ховар»/. 27 август дар Донишгоҳи техникии Тоҷикистон ба номи академик Муҳаммад Осимӣ Чемпионати ҷаҳонии касбӣ аз рӯйи номинатсияҳои «Корҳои геологӣ ва геодезия» ва «Энергетика» доир гардид, хабар доданд ба АМИТ «Ховар» аз ин донишгоҳ.

Дар чемпионат дастаҳои иштирокчӣ аз донишгоҳҳо ва муассисаҳои таълимии Ҷумҳурии Тоҷикистон ва Ҷумҳурии Мардумии Чин иштирок намуданд.

Чемпионати ҷаҳонии касбӣ имконият фароҳам меорад, ки  донишҷӯён маҳорати худро дар ин самтҳо нишон дода, омӯзиши усулҳои навро дар ин бахш тақвият диҳанд.

Зимни оғози чемпионат ректори Донишгоҳи техникӣ Қудрат Давлатзода аҳамияти мусобиқаҳои ҷаҳонии касбиро дар рушд ва такмили малакаҳои ҷавонон таъкид намуд.

Дар мусобиқа дар маҷмуъ 20 дастаи иштирокчӣ сабт шуда, тибқи нақша чемпионат имрӯз ҳам идома меёбад. Беҳтарин иштирокчиён дар даври навбатӣ дар сатҳи байналмилалӣ имкони муаррифии дастаи худро пайдо мекунанд.

АКС: Донишгоҳи техникии Тоҷикистон ба номи академик Муҳаммад Осимӣ