Дар Душанбе оид ба тарбияи насли наврас ҳамоиш доир гардид

ДУШАНБЕ, 21.08.2025. /АМИТ «Ховар»/. 20 август дар ноҳияи Фирдавсии шаҳри Душанбе таҳти унвони «Тарбияи насли ватандӯсту ояндасози фардо-рисолати омӯзгор» ҳамоиш баргузор гардид. Дар ин хусус ба АМИТ «Ховар» аз Сарраёсати маорифи шаҳри Душанбе иттилоъ доданд.

Дар ҳамоиш иброз гардид, ки таълиму тарбия равандест, ки бояд дар якҷоягӣ ба роҳ монда шуда, зина ба зина амалӣ карда шавад. Сари вақт таълиму тарбияи дуруст надодан ба насли наврас оқибати ногувор ба бор меорад. Аз ҷониби Ҳукумати мамлакат барои рушду ташаккули ҷаҳонбинӣ ва тафаккури созандаи насли наврас, ки неруи пешбарандаи ҷомеа маҳсуб мешавад, тадбирҳои зиёд ба тасвиб расидаанд.

Тарбияи наврасону ҷавонон вазифаи ҳар фарди ҷомеа ва муассисаю ниҳодҳои иҷтимоӣ мебошад. Президенти Ҷумҳурии Тоҷикистон муҳтарам Эмомалӣ Раҳмон дар суханрониҳояшон таъкид менамоянд, ки «ҷавонон бояд сабақҳои истиқлолиятро ҳамаҷониба омӯзанд, аз равандҳои сиёсати имрӯзаи мамлакат огаҳ бошанд, таърихи гузаштаву ҳозираи халқи худро гаштаю баргашта аз худ карда, аз Ватан, миллат, забон ва фарҳанги худ ифтихор намоянд».

Дар ҳамоиш 101 нафар собиқадорону омӯзгорон ва роҳбарони муассисаҳои таълимӣ барои хизматҳои бисёрсола дар соҳаи маориф, саҳми арзанда дар таълиму тарбияи насли наврас, тайёр намудани кадрҳои болаёқат ва иштироки фаъолона дар ҳаёти ҷамъиятӣ қадрдонӣ карда шуданд.

АКС: Сарраёсати маорифи шаҳри Душанбе