Дар хоҷагии деҳқонии «Қалъача»-и ноҳияи Бобоҷон Ғафуров навъи беҳамтои помидор парвариш карда мешавад

ДУШАНБЕ, 06.08.2025. /АМИТ «Ховар»/. Хоҷагии деҳқонии «Қалъача»-и ноҳияи Бобоҷон Ғафуров дорои 2 гектар замини корам буда, аъзои он асосан ба кишту парвариши помидор ва бодиринги навъҳои серҳосил машғуланд. Аъзои хоҷагӣ беш аз 15 сол мешавад, ки ба парвариши навъи беҳамтои помидор — «Дили армуғонӣ» машғуланд, ки дар бозорҳои дохилии мамлакат талабгори зиёд дорад. Дар ин хусус ба АМИТ «Ховар» аз хадамоти матбуоти Раиси вилояти Суғд хабар доданд.

Иттилоъ дода шуд, ки риояи қатъии қоидаҳои агротехникӣ, обу ғизодиҳии муназзам ва таҷрибаи ғании деҳқонон боиси фаровонҳосилии ин навъи маҳсулот гардид.

Ноҳияи Бобоҷон Ғафуров дар парвариш ва истеҳсоли сабзавоти хушсифат яке аз минтақаҳои пешсаф ба шумор меравад. Деҳқонони ноҳия барои ба даст овардани ҳосили баланд ва ғанӣ гардонидани бозорҳои мамлакат бо маҳсулоти ватании хушсифат кӯшиш ба харҷ медиҳанд.

Чунин талошҳо на танҳо ба таъмини амнияти озуқавории мамлакат мусоидат мекунанд, балки дар пешбурди иқтисодиёти миллӣ, фароҳам овардани ҷойи нави кор ва баланд бардоштани сатҳи зиндагии аҳолӣ низ нақши муҳим доранд.

АКС: Хадамоти матбуоти Раиси вилояти Суғд