Дар Истаравшан оид ба истифодаи сарфакоронаи неруи барқ ҷаласа доир гардид

ДУШАНБЕ, 20.08.2025 /АМИТ «Ховар»/. Зимни натиҷагирии фаъолияти филиали Ҷамъияти саҳомии кушодаи Шабакаҳои тақсимоти барқи минтақаи Истаравшан гирифтани маблағи иловагӣ ҳангоми васлу насби ҳисобкунакҳои барқӣ, изофанависӣ аз ҷониби кормандони соҳаи барқ ва хунукназарона муносибат кардан бо таҷҳизоти барқӣ ба мушоҳида расид. Нисбат ба онҳое, ки ба чунин кирдорҳои номатлуб ва ношоиста даст задаанд, ҷавобгарии маъмурӣ ва ҷиноятӣ пешбинӣ карда шуданд. Дар ин хусус зимни баргузории ҷаласаи гурӯҳи кории Ҳукумати Ҷумҳурии Тоҷикистон таҳти роҳбарии муовини Сарвазири Ҷумҳурии Тоҷикистон Усмоналӣ Усмонзода дар шаҳри Истаравшан иттилоъ дода шуд.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Истаравшан иттилоъ медиҳад, дар ҷаласа корҳои то имрӯз анҷомдодаи масъулину кормандони филиали Ҷамъияти саҳомии кушодаи Шабакаҳои тақсимоти барқи минтақаи Истаравшан ғайриқаноатбахш ҳисобида шуд. Масъулин вазифадор гардиданд, ки минбаъд барои сари вақт иҷро намудани дастуру супоришҳои роҳбарияти олии мамлакат ҷаҳду талоши дучанд намоянд.

Дар идомаи ҷаласа таъкид гардид, ки аз берун дахолат намудан ба таҷҳизоти ҳисоби барқӣ ва тағйир додани нишондоди он бо мақсади насупоридани маблағи истифодаи қувваи барқ, худсарона пайваст шудан ба шабакаҳо ва дастгоҳҳои таъминоти барқ, истифодаи қувваи барқ ва гармӣ бе асбоби зарурии назоратӣ ва бе баҳисобгирӣ ё бе шартнома бо ташкилоти таъминоти қувваи барқу гармӣ ҷазо таъйин гардидааст. Инчунин кандан ва шикастани пломбаҳои муқарраршудаи асбобҳои андозагирӣ ва истифодаи қувваи барқ бе пайвасткунӣ ба таҷҳизоти ҳисоби барқӣ ҷавобгарии маъмурӣ ва ҳатто маҳрум сохтан аз озодӣ ва то 10 соли зиндонро дар пай дорад.

Боиси таассуф аст, ки то имрӯз ҳолатҳои истифодаи ғайриқонунии қувваи барқ барои ба роҳ мондани истифодаи майнинг-фермаҳо, якчанд ҳолати изофанависӣ ва дахолат ба таҷҳизоти ҳисобкунакҳои барқӣ ошкор гардидаанд.

АКС: АМИТ «Ховар»