Дар Коллеҷи технологии шаҳри Душанбе 5 синфхонаи иловагӣ ба истифода дода мешавад

ДУШАНБЕ, 31.08.2025 /АМИТ «Ховар»/. Дар Коллеҷи технологии шаҳри Душанбе дар заминаи бинои ёрирасон 5 синфхонаи иловагӣ ба истифода дода мешавад.

Тавре АМИТ «Ховар» бо истинод ба Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон хабар медиҳад, синфхонаҳо бо меъёрҳои муосир сохта шуда, бо таҷҳизоти зарурии таълимӣ таъмин мегарданд.

Синфхонаҳо то соли нави таҳсил пурра омода шуда, бо ин иқдом имконияти таълимӣ васеъ мегардад ва донишҷӯён метавонанд дар шароити беҳтару муосир ба таҳсил фаро гирифта шаванд.

Бояд гуфт, ки дар соли таҳсили гузашта дар коллеҷ озмоишгоҳ-синфхонаҳои таълимӣ аз фанҳои физика, химия ва биология ба истифода дода шуданд. Озмоишгоҳҳои муосир бо тамоми таҷҳизоту лавозимоти зарурӣ муҷаҳҳаз буда, имконияти гузаронидани корҳои озмоишӣ ва назоратиро дар раванди дарсҳои амалӣ боз ҳам беҳтар менамоянд.

АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон