Дар корхонаҳои саноатии Тоҷикистон ба маблағи 1,8 миллиард сомонӣ масолеҳи сохтмонӣ истеҳсол карда шудааст

ДУШАНБЕ, 12.08.2025 /АМИТ «Ховар»/. Дар корхонаҳои саноатии Тоҷикистон дар шашмоҳаи якуми соли 2025 ба маблағи 1,8 миллиард сомонӣ масолеҳи сохтмонӣ истеҳсол карда шудааст, ки нисбат ба нишондоди ҳамин давраи соли 2024 212,2 миллион сомонӣ зиёд буда, суръати афзоиш 113,2 фоиз таъмин гардидааст.

АМИТ «Ховар» бо истинод ба Вазорати саноат ва технологияҳои нави Ҷумҳурии Тоҷикистон иттилоъ медиҳад, ки ҳиссаи соҳа дар ҳаҷми умумии истеҳсоли маҳсулоти саноатӣ 6,1 фоизро ташкил медиҳад.

Дар ин давра дар ҷумҳурӣ дар ҳаҷми 2,3 миллион тонна семент, 112,5 миллион дона хишт, 43,2 миллион дона хишти сементӣ, 1,5 миллион дона гаҷкартон, 1,2 миллион дона болопӯши абзестӣ (шифер), 37,5 ҳазор тонна оҳак, 1568,8 тонна ранги сохтмонӣ, 1 миллион метри мукааб қуму шағал, 299,7 ҳазор метри мукааб бетони сохтмонӣ, 14,5 ҳазор метри мураббаъ тахтасангҳо ва 48,7 ҳазор метри мураббаъ сангҳои ороишӣ истеҳсол гардидаанд.

Афзалияти сиёсати саноатии Тоҷикистон дар раванди саноатикунонии босуръати мамлакат барои рушди иқтисодиёт аввалиндараҷа маҳсуб мешавад. Давоми соли равон бо иштироки Президенти Тоҷикистон муҳтарам Эмомалӣ Раҳмон зимни сафарҳои корӣ дар шаҳру навоҳии мамлакат чандин корхонаи нави масолеҳи сохтмонӣ бо ҷалби сармояи беш аз 68 миллион сомонӣ бо таъсиси 220 ҷойи кор мавриди истифода қарор дода шуданд. Ба истифода додани корхонаи коркарди санг дар ноҳияи Ванҷ, корхонаҳои истеҳсоли шифер, бетон ва қуму шағал дар шаҳри Панҷакент ва корхонаи хишти сабук (газоблок) дар шаҳри Бӯстон аз ҳамин ҷумла мебошанд.

Барои афзоиш додани истеҳсоли маҳсулоти воридотивазкунанда ва ба содирот нигаронида дар шаҳри Душанбе аз ҷониби Ҷамъияти саҳомии пӯшидаи «Санталайс» давоми соли равон корхонаи истеҳсоли кошинҳои ороишӣ ба истифода дода мешавад.

Марзия САИДЗОДА,
АМИТ «Ховар»

АКС аз бойгонӣ