Доир ба мактаби сиёсию давлатдории Пешвои миллат китоб ба нашр расид

ДУШАНБЕ, 21.08.2025 /АМИТ «Ховар»/. «Мактаби сиёсию давлатдории Пешвои миллат — чароғи роҳи рушду тараққӣ» — таҳти ин унвон 18 август китоби таҳлилии Зафар Сайидзода ва Акрам Воҳидов  ба нашр расид, хабар медиҳад АМИТ «Ховар».

Дар пешгуфтори ин китоб, аз ҷумла омадааст: «Инсонҳо, бавижа ҷавонон, дар ҳар замоне барои расидан ба муваффақият ва камоли инсонӣ ниёзманд ба намунаҳои ибрат ҳастанд. Дар ҷумҳурии мо шахсият ва корномаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон беҳтарин сармашқ барои афроди ҷомеа дар тамоми арсаҳои зиндагӣ мебошад.

Ахлоқи наку, меҳрубонӣ ба ҳамватанон, устуворӣ, фазилат, бурдборӣ дар рафъи мушкилот, ки аз вижагиҳои ахлоқии Пешвои миллат ҳастанд, метавонанд барои такомули фард – ҳамчун шаҳрванд ва ҳамчун инсони дорои ахлоқу маънавиёти баланд нақши бузург ифо намоянд».

Фаъолияти пурбаракати Сарвари давлат муҳтарам Эмомалӣ Раҳмон ҳамчун меъмору бунёдкори бузурги Тоҷикистони навин дархӯри омӯзишу таҳқиқи амиқтару бунёдитар мебошад. Амиқтару бунёдитар аз баррасиҳое, ки муҳаққиқону пажӯҳишгарон то имрӯз анҷом додаанд. Чунин таҳлилу омӯзиши комилу ҳамаҷонибаро мактаби сиёсию давлатдории Эмомалӣ Раҳмон низ тақозо менамояд. Зеро мактаби сиёсии Пешвои миллат омили муҳимтарин ва асоситарини пешрафтҳои мамлакат ва мардуми мо дар роҳи пурифтихори истиқлол аст. Маҳз аз файзи ин мактаб имрӯз дар мамлакати мо сулҳу оромӣ, ваҳдату самимият ва сафою садоқати ҳамагонӣ ҳукмфармо ва заминаҳои мусоид барои ҳама гуна кору кӯшиши созанда фароҳам мебошанд.

АКС аз манбаъҳои боз