Намояндагони Тоҷикистон дар машварати минтақавӣ дар Қирғизистон иштирок намуданд

ДУШАНБЕ, 12.08.2025 /АМИТ «Ховар»/. Аз 5 то 8 август намояндагони Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон дар машварати минтақавӣ дар Қирғизистон иштирок намуданд.

Тавре АМИТ «Ховар» бо истинод ба Кумита оид ба таҳсилоти ибтидоӣ ва миёнаи касбӣ хабар медиҳад, машварат дар доираи Лоиҳаи DARYA- и Иттиҳоди Аврупо доир гардида, дар он ҳамзамон намояндагон аз Узбекистон, Туркманистон, Қирғизистон ва Қазоқистон иштирок намуданд.

Дар машварат масъалаҳои беҳтар намудани фаъолияти марказҳои рушди малакаҳои касбӣ, истифодаи кордҳои Scaffold барои самаранок гузаронидани машғулияти таълимӣ, инчунин роҳҳои баланд бардоштани касбияти омӯзгорони зинаҳои таҳсилоти миёнаи умумӣ, таҳсилоти ибтидоӣ ва миёнаи касбӣ ва таълими калонсолон мавриди муҳокима қарор дода шуданд.

Ҳамчунин масъалаҳои роҳу усулҳои самараноки ташкили раванди омодасозии кадрҳои коргарии дар бозори меҳнат рақобатпазир, ҷалб ва пайвастани ҷонибҳои манфиатдор ва корфармоëн ба раванди таълим ва омодасозии кадрҳои техникию коргарӣ, пайвастани раванди илм ба истеҳсолот ва дигар масоили марбут ба таҳсилоти касбӣ ва рушди малакаҳои касбӣ ҳал карда шуданд.

Иштирочиëн дар машварат тавассути корҳои гурӯҳию инфиродӣ, намоиши рӯнамоҳо ва саволу ҷавобҳо фаъолона иштирок намуда, бо сертификат қадрдонӣ гардиданд.

АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон