НИШАСТИ МАТБУОТӢ. Маҷмуи маҳсулоти минтақавии вилояти Хатлон ба 17,1 миллиард сомонӣ расид

ДУШАНБЕ, 08.08.2025 /АМИТ «Ховар»/. Дар шашмоҳаи якуми  соли равон маҷмуи маҳсулоти минтақавии вилояти Хатлон ба 17,1 миллиард сомонӣ расида, суръати рушди он 7,9 фоизро ташкил дод. Саҳми вилоят дар Маҷмуи маҳсулоти дохилии мамлакат 24,1 фоизро ташкил медиҳад. Дар ин хусус зимни нишасти матбуотии вилояти Хатлон муовини якуми раиси вилоят Музаффар Мирзозода иттилоъ дод.

Тибқи иттилоъ, дар ин давра 40 лоиҳаи давлатии сармоягузорӣ амалӣ гардида, ҳаҷми маблағгузорӣ ба 859 миллион доллари амрикоӣ расидааст. Ҳамзамон ба вилоят 2,6 миллион доллар сармояи хориҷӣ ҷалб карда шуд.

Дар нишасти матбуотӣ иброз гардид, ки ҳаҷми гардиши савдо ба 8 миллиард сомонӣ ва хизматрасонии пулакӣ ба 1,4 миллиард сомонӣ баробар шудааст, ки мутаносибан 8 ва 6 фоизи афзоишро нисбат ба соли 2024 нишон медиҳад.

Ба иттилои муовини якуми Раиси вилояти Хатлон Музаффар Мирзозода, ҳаҷми истеҳсоли маҳсулоти кишоварзӣ дар вилоят ба беш аз 14 миллиард сомонӣ расида, суръати афзоиш 110,4 фоизро ташкил додааст. Ҳиссаи вилояти Хатлон дар истеҳсоли маҳсулоти кишоварзии мамлакат 59 фоизро ташкил медиҳад.

Дар бахши саноат ҳаҷми истеҳсол ба 5,6 миллиард сомонӣ расидааст, ки нисбат ба ҳамин давраи соли 2024  634 миллион сомонӣ зиёд мебошад. Дар ин давра 42 корхона ва коргоҳи нави саноатӣ бо 287 ҷойи нави кор ба фаъолият оғоз намудаанд.

АКС: Мақомоти иҷроияи ҳокимияти давлатии вилояти Хатлон