Оид ба роҳҳои баланд бардоштани ҳосилнокии картошка дар минтақаҳои доманакӯҳ ҳамоиши ҷумҳуриявӣ доир шуд

ДУШАНБЕ, 04.08.2025. /АМИТ «Ховар»/. Дар ноҳияи Деваштичи вилояти Суғд бо иштироки муовини Сарвазири Ҷумҳурии Тоҷикистон Сулаймон Зиёзода дар мавзуи «Роҳҳои баланд бардоштани ҳосилнокии картошка дар минтақаҳои доманакӯҳ вобаста ба шароити тағйирёбии иқлим» ҳамоиши илмӣ-амалии ҷумҳуриявӣ доир шуд. Дар ин хусус ба АМИТ «Ховар» аз Вазорати кишоварзии Ҷумҳурии Тоҷикистон хабар доданд.

Муовини Сарвазири Ҷумҳурии Тоҷикистон Сулаймон Зиёзода иброз дошт, ки мақсади ҳамоиши илмӣ амалигардонии рушди устувори соҳаи картошкапарварӣ дар ҷумҳурӣ мебошад. Баргузории чунин ҳамоишҳои илмӣ ба баланд бардоштани ҳосилнокӣ ва афзун намудани ҳаҷми истеҳсоли картошка, табодули таҷриба ва таъмини яке аз ҳадафҳои асосии мамлакат – таъмини амнияти озуқаворӣ мусоидат менамояд.

Ёдовар мешавем, ки Президенти Ҷумҳурии Тоҷикистон муҳтарам Эмомалӣ Раҳмон дар ҷараёни сафари корӣ ба вилояти Суғд 12 июли соли 2025 ҳангоми шиносоӣ бо таҷрибаи картошкапарварони ноҳияи Деваштич бо назардошти омилҳои пешгӯинашаванда, тағйирёбии бесобиқаи иқлим ва оқибатҳои ногувори он ва захираи маводи ғизоии дусола барои истифодаи оқилонаю самараноки ҳар қитъа замин дастуру супоришҳои мушаххас доданд.

Иштирокчиёни ҳамоиш дар мавзуъҳои «Масъалаҳои актуалӣ ва самтҳои афзалиятноки тухмипарварӣ ва нигоҳдории картошка дар Тоҷикистон», «Технологияи парвариши картошка дар минтақаҳои кӯҳӣ ва доманкӯҳӣ», «Меъёр ва усулҳои обёрии картошка вобаста ба минтақа», «Касалию зараррасонҳои картошка ва чораҳои мубориза бар зидди онҳо», «Самаранокии иқтисодии картошка» ва «Саҳми кишоварзони ноҳияҳои Деваштич, Кӯҳистони Мастчоҳ ва Лахш дар истеҳсоли картошка»  маъруза намуданд.

АКС: Вазорати кишоварзии Ҷумҳурии Тоҷикистон