Вазири адлияи Тоҷикистон: «Бекоршавии ақди никоҳ тамоюли камшавӣ дорад»
ДУШАНБЕ, 08.08.2025. /АМИТ «Ховар»/. Дар шашмоҳаи якуми соли равон дар ҷумҳурӣ сабти ақди никоҳ 30 356 ҳолат (30 434 ҳолат дар ҳамин давраи соли 2024) ба қайд гирифта шуда, шумораи бекоршавӣ 4117 ҳолатро ташкил медиҳад. Ин нисбат ба ҳамин давраи ҳисоботӣ 291 ҳолат камтар мебошад. Дар ин хусус 7 август зимни нишасти матбуотӣ Вазири адлияи Ҷумҳурии Тоҷикистон Музаффар Ашуриён иттилоъ дод.
Тавре Вазири адлия иброз намуд, ҳарчанд бекоршавии ақди никоҳ дар мамлакат тамоюли камшавӣ дорад, вале ҳоло ҳам ин омор қонеъкунанда нест, зеро он аз рӯи шумора хеле зиёд мебошад. «Мо корҳои фаҳмондадиҳиро дар ин самт пеш мебарем. Дар ин замина таҳлилҳо нишон медиҳанд, ки омилҳои аз ҳам пошидани оилаҳои ҷавон, пеш аз ҳама, омода набудани ҷавонон барои ташкили оилаанд. Яъне ин муносибати рӯякии онҳо нисбат ба оиладорӣ мебошад. Омилҳо дар зиндагӣ гуногун ҳастанд, яъне баъд аз он ки издивоҷ мекунанд, пас сабабҳо пайдо мешаванд, ки шавҳар ин гуна будаасту ҳамсар ба зиндагӣ омода нест, нофаҳмиҳо дар байни ҷавонон рух медиҳанд. Фарзанддор нашудани ҳамсарон, дахолати волидайн ба зиндагию масъалаҳои оиладории ҷавонон, инчунин набудани шароити дурусти зиндагӣ барои оиладорӣ аз сабабҳои дигари ҷудошавии оилаҳо мебошанд», — гуфт Музаффар Ашуриён.
Тавре Вазири адлияи Тоҷикистон зимни нишасти матбуотӣ иброз дошт, ҷавононе, ки оила ташкил карданӣ ҳастанд, бояд нисбат ба оиладорию фарзанддорӣ мафкураи солим дошта бошанд. Дар оила нақши асосиро ҳурмату эҳтироми тарафайн ва боварии ҳамсарон ба якдигар мебозад. Ин андешаро мо бояд дар шуури ҷавонон ҷой намоем.
«Дар ин самт на танҳо мақомоти Сабти асноди ҳолати шаҳрвандӣ, балки дигар сохторҳои Вазорати адлия низ зимни вохӯриҳо, пешбурди корҳои тарғиботию ташвиқотӣ ва ҳуқуқӣ пайваста бо аҳолӣ суҳбатҳо мегузаронанд. Ҳамзамон дар самти баланд бардоштани маърифати ҳуқуқӣ ва донишҳои ҳуқуқии сокинони мамлакат тадбирҳои зарурӣ меандешанд»,-афзуд Вазири адлияи Тоҷикистон.
Шаҳлои САДРИДДИН,
АМИТ «Ховар»
АКС: АМИТ «Ховар»
Ҳамкории Маркази тадқиқоти стратегии Тоҷикистон бо Раёсати нашр ва паҳнкунии адабиёт бо забонҳои хориҷии Чин густариш меёбад
Таъсиси маркази касбомӯзӣ ва омӯзиши забонҳои арабӣ ва англисӣ барои муҳоҷирони меҳнатӣ баррасӣ шуд
Истифодаи барномаи «Амина» барои шаҳрвандони хориҷие, ки ба Русия бе раводид ворид мешаванд, ҳатмӣ мегардад
ТАВСИЯҲОИ МУФИД. Доир ба тарзи нави захира кардани меваҷоту сабзавот барои фасли зимистон
«ЭЪЛОМИЯИ ҲУҚУҚИ БАШАР». Таҳти чунин унвон ҳамоиши ҷумҳуриявӣ доир гардид
Китоби Пешвои миллат Эмомалӣ Раҳмон таҳти унвони «Ҳизби Халқии Демократии Тоҷикистон ва марҳилаҳои рушди Тоҷикистони соҳибистиқлол» рӯнамоӣ гардид
Дар Хадамоти иҷро оид ба татбиқи хизматрасониҳои электронӣ машварати омӯзишӣ доир гардид
Тақвияти ҳамкории Тоҷикистон ва Британияи Кабир дар соҳаи муҳоҷирати меҳнатии бехатар баррасӣ шуд
Дар фурудгоҳҳои байналмилалии Тоҷикистон оид ба муҳоҷирати меҳнатии қонунӣ ва бехатар корҳои фаҳмондадиҳӣ гузаронида шуданд
Дар Тоҷикистон Даҳаи дастгирии шири модар оғоз гардидааст
«ҲУҚУҚ БА САЛОМАТӢ». Таҳти чунин унвон озмуни байналмилалӣ доир мегардад
Лагери истироҳатию солимгардонии «Саодат» 360 кӯдакро ба истироҳат фаро гирифт
