Ҳайати Тоҷикистон дар Форуми чоруми Осиёи Марказӣ оид ба пиринг ва интерконнект иштирок намуд

ДУШАНБЕ, 27.09.2025. /АМИТ «Ховар»/. Дар шаҳри Алматои Ҷумҳурии Қазоқистон Форуми чоруми Осиёи Марказӣ оид ба пиринг ва интерконнект (CAPIF — 4) баргузор гардид, ки дар кори он намояндагони соҳаи алоқаи Тоҷикистон иштирок намуданд. Дар ин хусус ба АМИТ «Ховар» аз Хадамоти алоқаи назди Ҳукумати Ҷумҳурии Тоҷикистон хабар доданд.

Мақсади баргузории форум тақвияти робитаҳои интернетӣ дар Осиёи Марказӣ арзёбӣ гардид.

Иброз шуд, ки «CAPIF — 4» минбари мубодилаи таҷриба, густариши ҳамкорӣ ва баррасии масъалаҳои муҳими рушди инфрасохтори интернетӣ дар минтақа мебошад.

Намояндагони Тоҷикистон дар форум оид ба рушду тавсеаи хадамоти интернетӣ, такмили инфрасохтори соҳа, нақши интернет дар фаъолияти соҳаҳои гуногун ва ислоҳоти ин соҳа дар Тоҷикистон маълумот доданд.

«Тоҷикистон барои густариши додани ҳамкорӣ бо дигар кишварҳо дар соҳаи алоқа ва таҳкими фаъолияти операторони шабака ва интернет-провайдерҳо ҳавасманд аст», -изҳор доштанд намояндагони Тоҷикистон.

АКС: Хадамоти алоқаи назди Ҳукумати Ҷумҳурии Тоҷикистон