Ҳамкории Институти масъалаҳои об, гидроэнергетика ва экологияи Тоҷикистон ва Донишгоҳи захираҳои табиӣ ва илмҳои амалии Австрия густариш меёбад

ДУШАНБЕ, 25.09.2025 /АМИТ «Ховар»/. Дар Институти масъалаҳои об, гидроэнергетика ва экологияи Академияи миллии илмҳои Тоҷикистон бо намояндагони Донишгоҳи захираҳои табиӣ ва илмҳои амалӣ (BOKU)-и Австрия вохӯрии корӣ баргузор шуда, зимни он ҳамкории илмии дуҷониба баррасӣ гардид.

Тавре АМИТ «Ховар» бо истинод ба Институти масъалаҳои об, гидроэнергетика ва экология хабар медиҳад, дар вохӯрӣ имконияти ҳамкорӣ зимни гузаронидани таҳлили муштараки лаборатории консентратсияи моддаҳои дар об овезон ва таркиби гранулометрии таҳшинҳо баррасӣ гардид.

Ҷонибҳо инчунин барои гузаронидани таҳқиқоти муштарак ва экспедитсияҳои байналмилалӣ, таҳияи мақолаҳои илмӣ, ташкили корҳои саҳроӣ, баргузор намудани машваратҳо ва тренингҳои омӯзишӣ изҳори омодагӣ намуданд.

Бояд гуфт, ки Донишгоҳи захираҳои табиӣ ва илмҳои амалӣ (BOKU) яке аз марказҳои пешқадами илмию таълимии Аврупо дар самти рушди устувор, кишоварзӣ, ҳифзи муҳити зист ва истифодаи оқилонаи захираҳои табиӣ ба ҳисоб меравад. Донишгоҳ бо равиши байнисоҳавӣ, ки илмҳои табиӣ, муҳандисӣ ва иқтисодро дар бар мегирад, маъруф аст.

АКС: Институти масъалаҳои об, гидроэнергетика ва экологияи Академияи миллии илмҳои Тоҷикистон