Барои кормандони соҳаи ҳифзи муҳити зист ва ҳифзи ҳуқуқ машғулияти омӯзишӣ баргузор гардид

ДУШАНБЕ, 21.09.2025 /АМИТ «Ховар»/. Бо мақсади баланд бардоштани маърифати ҳуқуқии кормандони соҳаи ҳифзи муҳити зист ва ҳифзи ҳуқуқ дар шаҳри Душанбе дар мавзуи «СИТЕС ва идентификатсияи ҳайвонот ва растаниҳое, ки объекти тиҷорати ғайриқонунии байналмилалӣ маҳсуб мешаванд» машғулияти омӯзишӣ баргузор шуд.

Тавре АМИТ «Ховар» бо истинод ба Академияи миллии илмҳои Тоҷикистон хабар медиҳад, машғулият дар доираи ҳамкории Институти зоология ва паразитология бо Ташкилоти байналмиллалии «Фауна ва Флора Интернэшнл» ташкил карда шуд.

Мутахассисон аз Академияи миллии илмҳо, милитсияи экологӣ, Хадамоти гумрук, ҳудудҳои табиии махсус муҳофизатшаванда ва намояндагони ташкилоти байналмилалии «Фауна флора Интернешнл» бо рӯнамоҳо баромад намуданд.

Коршиносони Академияи миллии илмҳо дар бораи намудҳои ба замимаҳои I, II, III -и СИТЕС воридгардидаи ҳайвонот ва набототи Тоҷикистон ва намудҳои экзотикӣ, инчунин тарз ва роҳҳои интиқоли ҳайвонот ва растаниҳо маълумот доданд. Масъалаи тиҷорати байналмилалии ҳайвонот ва наботот тибқи талаботи Конвенсияии СИТЕС баррасӣ гардид.

Кормандони илмии Институти зоология ва паразитология дар бораи ширхӯрон, парандагон, хазандагон ва ҳашарот маълумот доданд.

АКС:Академияи миллии илмҳои Тоҷикистон