Дар Бӯстон ба ифтихори Рӯзи забони давлатӣ ҳамоиш баргузор гардид

ДУШАНБЕ, 24.09.2025. /АМИТ «Ховар»/. Дар Муассисаи таълимии гимназияи №2-и шаҳри Бӯстон ба ифтихори Рӯзи забони давлатӣ таҳти унвони «Забони модарӣ-забони назми оламгири тоҷик» ҳамоиш баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Бӯстон иттилоъ доданд.

Дар ҳамоиш иброз гардид, ки забон аз қадимтарин замонҳо то имрӯз муҳимтарин воситаи муошират байни одамон, табодули захираҳои маънавӣ ва омили аслии пешрафти тамаддунҳо мебошад. Қудрати забон – қудрати миллат ва намунаи олии дараҷаи рушди диалектикии ҳаёти сиёсию фарҳангии он давоми ҳазорсолаҳо мебошад. Забон, фарҳанг ва тамаддуни миллӣ бе собиқа ва таҷрибаи давлатдорӣ, яъне пуштибонии сиёсӣ имкони такомул надоранд.

Президенти Ҷумҳурии Тоҷикистон муҳтарам Эмомалӣ Раҳмон дар муқаддимаи китоби худ «Забони миллат-ҳастии миллат» чунин таъкид намудаанд: «Танҳо забон аст, ки дар ҳама давру замон таърихи воқеӣ ва ростини миллатро дар ҳофизаи худ нигоҳ медорад».

Забон- таъминкунандаи ҳастии давлат, ифодакунандаи рамзи миллат ва воситаи муҳимтарини алоқа байни одамон ба шумор меравад. Таърих гувоҳ аст, ки забони тоҷикӣ то ба ин давра чандин пайраҳаҳоро тай намуда, бо ибтикори фарзонафарзандони миллат поку беолоиш то ба мо расидааст.

Ёдовар мешавем, ки ҳамасола дар мамлакат 5 октябр чун Рӯзи забони тоҷикӣ таҷлил мегардад.

АКС: Мақомоти иҷроияи ҳокимияти давлатии шаҳри Бӯстон