Дар Душанбе конфронси байналмилалӣ оид ба роҳнамои стратегии рушди иқтисоди миллӣ доир мегардад

ДУШАНБЕ, 16.09.2025. /АМИТ «Ховар»/. 30 сентябр ва 1 октябр дар шаҳри Душанбе дар мавзуи «Роҳнамои стратегии рушди иқтисоди миллӣ: навовариҳо, савдо ва рақамикунонӣ» конфронси байналмилалии илмӣ-амалӣ доир мегардад. Дар ин хусус ба АМИТ «Ховар» аз Муассисаи давлатии «Пажӯҳишгоҳи илмию таҳқиқотии иқтисодии Вазорати рушди иқтисод ва савдои Ҷумҳурии Тоҷикистон» хабар доданд.

Конфронс бо ташаббуси Муассисаи давлатии «Пажӯҳишгоҳи илмию таҳқиқотии иқтисодии Вазорати рушди иқтисод ва савдои Ҷумҳурии Тоҷикистон» доир мешавад. Дар конфронс ҳадафҳои стратегии рушди иқтисодӣ, ҷанбаҳои инноватсионии рушди иқтисодӣ ва савдо, самтҳои асосии рушди устувори иқтисодӣ ва савдо дар шароити рақамикунонӣ мавриди муҳокима қарор мегиранд.

Дар конфронси байналмилалӣ доир ба асосҳои илмии трансформатсияи рақамикунонӣ, соҳаҳои ёрирасони рақамикунонии ҳолати кунунии хоҷагии халқи Тоҷикистон, ҳамбастагии иқтисоди рақамӣ ва таъминоти маърифатӣ-техникии рақамикунонӣ, савдои электронӣ, тиҷорати электронӣ ва иқтисоди рақамӣ, зеҳни сунъӣ, ҳамгироии илм, таҳсил ва соҳибкорӣ маърузаҳо пешниҳод мешаванд.

АКС аз манбаъҳои боз