Дар Ҷопон фарҳанг ва таомҳои миллии тоҷикӣ муаррифӣ карда шуд

ДУШАНБЕ, 10.09.2025. /АМИТ «Ховар»/. Бо ташаббуси Сафорати Ҷумҳурии Тоҷикистон дар Ҷопон бахшида ба 34-солагии Истиқлоли давлатии Ҷумҳурии Тоҷикистон донишҷӯёни тоҷике, ки дар Донишгоҳи Акитаи Ҷопон таҳсил доранд, дар Фестивали байналмилалии шаҳри Акита иштирок намуданд. Дар ин хусус ба АМИТ «Ховар» аз Агентии «Тоҷикстандарт» иттилоъ доданд.

Дар фестивал, ки бо ҳузури беш аз 20 давлати ҷаҳон доир гардид, донишҷӯён фарҳанг, ёдгориҳои таърихӣ ва таомҳои миллии тоҷикиро муаррифӣ карданд. Ҳамзамон дар бораи ташаббусҳои ҷаҳонии Пешвои миллат ва дастовардҳои Ҷумҳурии Тоҷикистон давоми солҳои соҳибистиқлолӣ дар арсаи байналмилалӣ маълумот пешниҳод гардид.

Фестивал бо мақсади дӯстӣ ва равобити фарҳангии Акита бо давлатҳои ҷаҳон баргузор гардида, саҳми донишҷӯёни тоҷик дар он чун қадами муҳим дар муаррифии фарҳанги миллӣ арзёбӣ гардид.

Таваҷҷуҳи иштирокчиён ва меҳмононро хӯрокҳои миллии тоҷикӣ, аз қабили оши палов, қурутоб, шириниҳои анъанавӣ ва дигар таомҳои маъруф ҷалб намуд. Ҳамзамон дар ҷараёни фестивал доир ба дастовардҳои миллӣ ва ташаббусҳои созандаи Пешвои миллат муҳтарам Эмомалӣ Раҳмон, ки дар сатҳи байналмилалӣ мавқеи намоён доранд, маълумоти муфассал пешниҳод шуд.

Хусусан ба ташаббусҳои ҷаҳонии Пешвои миллат дар самтҳои ҳаётан муҳим ва глобалӣ, аз қабили ҳифзи захираҳои об, истифодаи устувори онҳо ва масъалаи пиряхҳо, ки барои Тоҷикистон ва минтақаи Осиёи Марказӣ аҳамияти стратегӣ доранд, таваҷҷуҳи махсус зоҳир гардид.

АКС: Агентии «Тоҷикстандарт»