Дар Суди конститутсионӣ бахшида ба Истиқлоли давлатӣ ҷаласаи тантанавӣ баргузор шуд

ДУШАНБЕ, 07.09.2025 /АМИТ «Ховар»/. 9 сентябр — Рӯзи Истиқлолияти давлатии Ҷумҳурии Тоҷикистон дар саросари мамлакат бо шукуҳу шаҳомати хосса ҷашн гирифта мешавад.   Истиқлолияти давлатӣ дастоварди бузург дар таърихи давлатдории тоҷикон мебошад. «Истиқлолият» мафҳуми арзишманд ва дар навбати худ калидие мебошад, ки ноил гардидан ба он шарафи бузург барои ҳар миллат аст. Ин матлабро Раиси Суди конститутсионии Ҷумҳурии Тоҷикистон Абдулҳафиз Ашурзода зимни маҷлиси тантанавӣ баён намуд.

Абдулҳафиз Ашурзода иброз дошт, ки Истиқлолияти давлатии Тоҷикистон, ки таърихи 34-сола дорад, ба он мусоидат намуд, ки дар ҳаёти сиёсӣ, иқтисодӣ ва иҷтимоию фарҳангии ҷумҳурӣ комёбиҳои беназир ба даст оварда шаванд.

Яке аз дастовардҳои сиёсии истиқлолияти давлатӣ- ин эъмори давлатдории миллӣ мебошад, ки дар таърихи муосири Тоҷикистон падидаи нодир буда, дастоварди беназир мебошад.

Таъкид шуд, ки бунёди роҳҳои оҳан ва мошингард, ба монанди роҳи мошингарди Бадахшон, нақби «Истиқлол», роҳи оҳани Хатлону Кӯлоб, бунёди Неругоҳи барқи обии «Роғун», «Сангтӯда-1», «Сангтӯда- 2» ва дигар иншооти бузург падидаҳои даврони истиқлолият маҳсуб мешаванд.

Қабул  гардидани якчанд қонунҳои миллӣ иқдоми бузург барои ҳифзи вазъи иқтисодӣ, иҷтимоӣ ва маънавии ҷомеа буда, пеш аз ҳама, ба барқарор гардидани адолати иҷтимоӣ равона гардидаанд.

Истиқлолияти давлатӣ барои рушди иқтисодиёти ватанӣ шароити мусоид фароҳам овард. Амалӣ гардонидан ва тақвият бахшидани раванди татбиқи се ҳадафи стратегӣ – баромадан аз бунбасти коммуникатсионӣ, таъмини амнияти озуқавории мамлакат ва ба даст овардани истиқлолияти энергетикӣ вазифаҳои аввалиндараҷа буда, муҳайё намудани заминаҳои воқеӣ дар ҷумҳурӣ оид ба рушди соҳибкорӣ ва дар маҷмуъ, баланд бардоштани иқтисодиёт муҳим мебошад.

Имрӯз Истиқлоли давлатӣ барои амалӣ гардонидани ҳадафҳои асосии давлати Тоҷикистон, ки ҳамчун пойдевори адолати иҷтимоӣ дар майдони сиёсат побарҷо истодааст, нақш ва манзалати худро дар марҳилаи нави рушд бозтобӣ менамояд.

АКС: Суди конститутсионии Ҷумҳурии Тоҷикистон