«Гимназияи ба номи Ҷалол Икромӣ»-и ноҳияи Ховалинг барои 456 хонанда дар як баст пешбинӣ шудааст

ДУШАНБЕ, 11.09.2025 /АМИТ «Ховар»/. Муассисаи таълимии хусусии «Гимназияи ба номи Ҷалол Икромӣ» дар ноҳияи Ховалинг, ки имрӯз бо иштироки Сарвари давлат муҳтарам Эмомалӣ Раҳмон ба истифода дода шуд, аз ду ошёна иборат буда, барои 456 хонанда дар як баст пешбинӣ гардидааст, хабар медиҳад АМИТ «Ховар».

Муассисаи мазкур аз ҷониби соҳибкори ватандӯст Абдулло Ҳасанов ба истиқболи ҷашни бузурги миллӣ – 35-солагии Истиқлоли давлатӣ бунёд гардидааст. Корҳои сохтмонӣ дар ин гимназияи моҳи феврали соли 2025 дар масоҳати умумии 4 ҳазору 860 метри мураббаъ оғоз гардида, моҳи августи соли равон анҷом ёфтааст. Баробари ифтитоҳи муассисаи таълимӣ 60 мутахассиси маҳалии соҳаи илму маорифи ноҳияи Ховалинг бо кори доимӣ ва маоши хуб таъмин гардиданд.

«Гимназияи ба номи Ҷалол Икромӣ» дорои китобхонаи электронӣ, толори варзишии болопӯшида, майдончаи варзишӣ, синфхонаҳои махсуси фаннӣ, ошхона ва биноҳои ёрирасон буда, бо шабакаи мустақилли гармидиҳӣ таъмин мебошад. Муассисаи таълимӣ дорои се озмоишгоҳи фанҳои физика, кимиё ва биология буда, дар он барои омодагӣ ба озмуну олимпиадаҳои ҷумҳурявӣ ва байналмилалӣ 12 маҳфили фаннӣ ба роҳ монда шудааст.

Маблағи лоиҳавии сохтмони гимназияи мазкур 5 миллиону 500 ҳазор сомониро ташкил медиҳад. Ин муассисаи таълимӣ бо назардошти талаботи соҳа, унсурҳои меъмории миллӣ ва ҷавобгӯ ба стандартҳои байналмилалӣ бо сифати баланд бунёд гардида, синфхона ва кабинетҳои фаннию таълимӣ бо таҷҳизот ва аёнияти дарсӣ муҷҷаҳаз ва фароҳам гардонида шудааст.

АКС: Хадамоти матбуоти Президенти Ҷумҳурии Тоҷикистон