Намояндаи Суди конститутсионии Тоҷикистон дар Форуми байналмилалии адолати конститутсионӣ иштирок намуд

ДУШАНБЕ, 12.09.2025 /АМИТ «Ховар»/. Имрӯз дар шаҳри Остонаи Ҷумҳурии Қазоқистон ба муносибати 30-солагии рӯзи қабули Конститутсияи ин давлат Форуми байналмилалии адолати конститутсионӣ баргузор гардид, ки дар он судяи Суди конститутсионии Ҷумҳурии Тоҷикистон Фотеҳ Қувватзода иштирок намуд.

Тавре ба АМИТ «Ховар» аз Суди конститутсионӣ хабар доданд, Фотеҳ Қувватзода дар мавзуи «Нақши Конститутсия дар таъмини ҳуқуқҳои миллӣ» гуфт, ки «конститутсияҳое, ки бо роҳи раъйпурсии умумихалқӣ қабул карда мешаванд, на танҳо санади олии ҳуқуқӣ, балки ормонҳои дар замири халқ парваридае мебошанд, ки решаи он ба таърихи дурударози ҳар халқияту миллат асос ёфтааст.

Бинобар ин бояд ба ин ҳуҷҷати муҳими ҳуқуқӣ,  таърихию сиёсӣ аз ҷониби  давлатҳо ва институтҳои хориҷӣ эҳтиром гузошта шавад. Ҳамзамон дар хотир доштан зарур аст, ки Конститутсия дар сатҳи олии ҳуқуқӣ ифодакунандаи ирода ва манфиати тамоми ҷомеа ва давлати миллӣ мебошад».

Иброз гардид, ки баъди ноил шудан ба Истиқлолияти давлатӣ дар Ҷумҳурии Тоҷикистон 6 ноябри соли 1994 бо роҳи раъйпурсии умумихалқӣ Конститутсияи даврони соҳибистиқлолӣ  қабул карда шуд. Он яке аз арзишмандтарин дастоварди замони соҳибистиқлолӣ маҳсуб мешавад.

Конститутсияи Ҷумҳурии Тоҷикистон заминаи ҳуқуқии бунёди ҷомеаи шаҳрвандӣ буда, дар он инсон ва ҳуқуқу озодиҳои ӯ арзиши олӣ эътироф гардидааст.

Ҳамзамон ҳуқуқу озодиҳои инсон ва шаҳрванд  ҷавҳари асосии фаъолияти ҳокимияти қонунгузор, иҷроияи маҳаллӣ, худидоракунӣ ва нишонаи сифати ҳуқуқии санадҳои меъёрии онҳо эътироф карда мешавад.

АКС: Суди конститутсионии Ҷумҳурии Тоҷикистон