72 оилаи омӯзгорони Донишгоҳи давлатии Данғара бо манзили истиқоматӣ таъмин мегарданд

ДУШАНБЕ, 24.10.2025. /АМИТ «Ховар»/. Барои омӯзгорони Донишгоҳи давлатии Данғара ду бинои нуҳошёнаи истиқоматӣ сохта мешавад. Сохтмони биноҳо дар масоҳати 1430 метри мураббаъ дар кӯчаи Исмат Шарифи шаҳраки Данғара ба нақша гирифта шудааст, хабар медиҳад АМИТ «Ховар».

Ҳарду бино аз нуҳ ошёна иборат буда, 36 хонаи дуҳуҷрагӣ бо масоҳати 67,84 метри мураббаъ ва 36 хонаи якҳуҷрагӣ бо масоҳати 52,80 метри мураббаъ пешбинӣ гардидааст, ки барои таъмини 72 оилаи омӯзгор бо манзили истиқоматӣ пешбинӣ гардидааст. Манзилҳои истиқоматӣ дар 3 сол омода хоҳанд шуд.

Ёдовар мешавем, ки 23 октябри соли равон зимни сафари корӣ ба ноҳияи Данғара, Президенти мамлакат муҳтарам Эмомалӣ Раҳмон дар ифтитоҳи ду бинои нави таълимии Донишгоҳи давлатии тиббии Хатлон иштирок намуданд. Дар ҳамин ҷо, Сарвари давлат муҳтарам Эмомалӣ Раҳмон бо лоиҳаи бунёди ду бинои нуҳошёнаи истиқоматӣ барои омӯзгорони Донишгоҳи давлатии Данғара шинос шуданд. Таъкид гардид, ки Ҳукумати мамлакат маорифро аз соҳаҳои калидӣ ва пешбарандаи ҷомеа эътироф менамояд. Омӯзгорону олимонро захираи бузурги зеҳнии ҷомеа медонад ва мақоми олимону омӯзгоронро аз нигоҳи иҷтимоӣ, маънавӣ ва молиявӣ давра ба давра баланд мебардорад.

АКС: Хадамоти матбуоти Президенти Ҷумҳурии Тоҷикистон/ АМИТ «Ховар»