Ҳамкории илмӣ дар самтҳои зеҳни сунъӣ ва рақамикунонӣ бо намояндагони Чин баррасӣ карда шуд

ДУШАНБЕ, 16.10.2025 /АМИТ «Ховар»/. Бо мақсади ба роҳ мондани ҳамкории илмӣ дар самтҳои зеҳни сунъӣ ва рақамикунонӣ 15 октябр президенти Академияи миллии илмҳои Тоҷикистон Қобилҷон Хушвахтзода бо гурӯҳи шарикон аз Ҷумҳурии Мардумии Чин мулоқот намуд, хабар медиҳад АМИТ «Ховар» бо истинод ба академия.

Ҷонибҳо аҳамияти рушди ҳамкориро дар ин самтҳо таъкид намуда, барои таҳкими ин раванд изҳори омодагӣ намуданд. Иброз гардид, ки дар шароити ҷаҳони муосир зеҳни сунъӣ ва рақамикунонӣ ба масъалаҳои калидӣ мубаддал шудаанд, ки дар тамоми соҳаҳо татбиқи васеъ меёбанд.

Президенти Академияи миллии илмҳо изҳор дошт, ки ба ин масъалаи мубрам Президенти Тоҷикистон муҳтарам Эмомалӣ Раҳмон таваҷҷуҳи махсус зоҳир намуда, дар суханрониашон дар Созмони Милали Муттаҳид таъкид намуданд, ки рушди зеҳни сунъӣ бояд таҳти назорати байналмилалӣ қарор гирад ва истифодаи он бояд ба нафъи инсоният ва рушди устувор равона карда шавад.

Ҳамзамон муҳтарам Эмомалӣ Раҳмон аз минбари Созмони Милали Муттаҳид пешниҳод намуданд, ки бо мақсади тақвияти ҳамкорӣ дар соҳаи технологияҳои муосир дар шаҳри Душанбе Маркази зеҳни сунъӣ таъсис ёбад. Бо истифода аз имконияти мавҷуда мо метавонем ҳамкории дуҷониба ва бисёрҷонибаро дар соҳаҳои зеҳни сунъӣ ва рақамикунонӣ таҳким бахшида, дар оянда ба натиҷаҳои назарраси илмӣ ва амалии муштарак ноил шавем.

Иброз гардид, ки соҳаи рақамикунонӣ имрӯз дар Тоҷикистон яке аз самтҳои муҳими рушд буда, барои такмили инфрасохтори рақамӣ ва тавсеаи хизматрасониҳои электронӣ тадбирҳои иловагӣ андешидан зарур аст.

АКС: Академияи миллии илмҳои Тоҷикистон