Бахшида ба Рӯзи забони давлатӣ дар Донишгоҳи технологии Тоҷикистон конфронси илмӣ-амалӣ доир гардид

ДУШАНБЕ, 05.10.2025. /АМИТ «Ховар»/. Дар Донишгоҳи технологии Тоҷикистон бахшида ба Рӯзи забони давлатӣ таҳти унвони «Саҳми Пешвои миллат дар рушди забони давлатӣ» конференсияи илмӣ-амалӣ доир шуд. Дар ин хусус ба АМИТ «Ховар» аз ин донишгоҳ хабар доданд.

Иброз гардид, ки забони тоҷикӣ чун бузургтарин сармояи маънавии миллат давоми ҳазорсолаҳо пойдор мондааст. Он имрӯз бо пуштибонӣ ва ғамхориҳои пайвастаи Пешвои миллат муҳтарам Эмомалӣ Раҳмон ба марҳалаи нав — марҳалаи рушди байналмилалӣ ворид гардидааст.

Маҳз бо сиёсати хирадмандонаи Президенти Ҷумҳурии Тоҷикистон муҳтарам Эмомалӣ Раҳмон Стратегияи давлатии забон таҳия ва амалӣ гардида, заминаи устувор барои ҳифз ва рушди он фароҳам оварда шуд. Аз ҷумла, «Стратегияи рушди забони давлатӣ барои солҳои 2020–2030» имконият медиҳад, ки забони тоҷикӣ дар тамоми соҳаҳои ҳаёти иҷтимоӣ, сиёсӣ, илмӣ ва фарҳангӣ мавқеи пешбари худро нигоҳ дорад. Амалисозии ин ҳуҷҷати муҳими барномавӣ яке аз омилҳои асосии таъмини истиқлолияти комили забонӣ ба шумор меравад.

Рисолати ҳар шахси соҳибфазл он аст, ки бо истифодаи дурусти забон, тозагии истилоҳот ва арҷгузорӣ ба арзишҳои маънавӣ ба наслҳои оянда хизмат намояд.

Ёдовар мешавем, ки баргузории чунин ҳамоишҳои илмӣ-амалӣ на танҳо ба таҳкими ҷойгоҳи забони давлатӣ дар ҷомеа мусоидат менамояд, балки ба тарбияи ҳисси худшиносию худогоҳии миллӣ, арҷгузорӣ ба арзишҳои фарҳангӣ ва ифтихори миллӣ низ замина мегузорад. Маҳз тавассути чунин чорабиниҳо наслҳои оянда аз қадру манзалати забони модарӣ огоҳ гардида, рисолати онро ҳамчун рамзи давлатдорӣ ва пояи бақои миллат бо масъулият ҳифз хоҳанд кард.

АКС: Донишгоҳи технологии Тоҷикистон