Байни Донишгоҳи давлатии омӯзгории Тоҷикистон ва Донишгоҳи миллии илмҳои компютерӣ ва рушдёбандаи Покистон созишномаи ҳамкорӣ ба имзо расид

ДУШАНБЕ, 16.10.2025. /АМИТ «Ховар»/. Байни Донишгоҳи давлатии омӯзгории Тоҷикистон ба номи Садриддин Айнӣ ва Донишгоҳи миллии илмҳои компютерӣ ва рушдёбандаи Покистон созишномаи ҳамкорӣ ба таври маҷозӣ ба имзо расид. Дар ин хусус ба АМИТ «Ховар» аз Донишгоҳи давлатии омӯзгорӣ хабар доданд.

Созишнома аз ҷониби ректори Донишгоҳи давлатии омӯзгории Тоҷикистон ба номи Садриддин Айнӣ Аҳлиддин Ибодуллозода ва ректори Донишгоҳи миллии илмҳои компютерӣ ва рушдёбанда Офтоб Аҳмад Маруф дар асоси оинномаҳои ҳарду муассиса ба имзо расонида шуд.

Ҳадафи асосии созишнома ба роҳ мондани ҳамкории дарозмуддати байналмилалӣ дар самтҳои таълим, илм, таҳқиқот ва мубодилаи таҷриба дар самти омӯзиши зеҳни сунъӣ мебошад.

Тибқи бандҳои созишнома, ҷонибҳо дар самтҳои омӯзиши зеҳни сунъӣ, рушди табодули таҷрибаомӯзии омӯзгорон ва донишҷӯён, таҳия ва татбиқи барномаҳои муштараки таълимӣ ва илмӣ, ташкили конфронсҳо, семинарҳо ва мизҳои гирд, нашри маводи илмӣ ва методӣ, густариши робитаҳои илмӣ ва омӯзишӣ барои баланд бардоштани сифати таҳсил ҳамкорӣ менамоянд.

Ёдовар мешавем, ки Донишгоҳи давлатии омӯзгории Тоҷикистон ҳоло бо зиёда аз 117 муассисаи олии ватанию хориҷӣ дар самтҳои илмӣ-таълимӣ ва фарҳангӣ ҳамкории судманд ба роҳ мондааст. Донишгоҳ тасмим гирифтааст, ки дар оянда доираи ин ҳамкориро бо муассисаҳои бонуфузи байналмилалӣ боз ҳам тавсеа бахшад.

АКС аз бойгонӣ