Дар Донишгоҳи давлатии Кӯлоб барои донишҷӯёни варзишгар шароити мусоид фароҳам оварда шудааст

ДУШАНБЕ, 22.10.2025. /АМИТ «Ховар»/. 20 октябр дар Донишгоҳи давлатии Кӯлоб ба номи Абуабдуллоҳи Рӯдакӣ бо донишҷӯёни варзишгар вохӯрӣ баргузор гардид. Дар ин хусус ба АМИТ «Ховар» аз ин донишгоҳ хабар доданд

Ректори Донишгоҳи давлатии Кӯлоб Мунир Сафарзода иброз дошт, ки дар донишгоҳ барои омӯзишу тамрини варзишгарон шароити зарурию инфрасохтори мусоид фароҳам оварда шудааст, ки ин ба рушди қобилияти варзишии донишҷӯён мусоидат менамояд.

Варзиш имрӯз ба унвони василаи муассири тарғиби тарзи ҳаёти солим, таҳкими дӯстию рафоқат байни ҷавонон ва  унсури муҳими пайвандсозу муаррифи фарҳангу тамаддуни миллӣ дар сатҳи байналмилалӣ эътироф шудааст.

Сарвари давлат дар яке аз суханрониҳо баён доштанд, ки «варзиш яке аз василаҳои муҳимми ҳифзу таҳкими саломатии аҳолӣ, қосиди сулҳу субот, омили ташаккулдиҳандаи нерую тавоноии инсон ва инъикоскунандаи симои халқу миллат дар арсаи ҷаҳон ба ҳисоб меравад».

Вохӯрӣ дар фазои ҳамдигарфаҳмӣ, эҳтиром ва ҷонибдорӣ аз арзишҳои миллӣ ва сиёсати хирадмандонаи Пешвои миллат муҳтарам Эмомалӣ Раҳмон доир карда шуд.

АКС: Донишгоҳи давлатии Кӯлоб ба номи Абуабдуллоҳи Рӯдакӣ