Дар Душанбе доир ба асосҳои қонунгузории гузариш ба рушди «сабз» ҳамоиш баргузор гардид

ДУШАНБЕ, 02.10.2025. /АМИТ «Ховар»/. Бо ташаббуси комиссияи экологии Маҷлиси намояндагони Маҷлиси Олии Ҷумҳурии Тоҷикистон таҳти раёсати муовини Раиси Маҷлиси намояндагони Маҷлиси Олии Ҷумҳурии Тоҷикистон Азиз Гиёзода дар мавзуи «Парламент ва иқтисоди даврӣ дар Тоҷикистон: асосҳои қонунгузории гузариш ба рушди «сабз»» ҳамоиш доир гардид. Дар ин хусус ба АМИТ «Ховар» аз Маҷлиси намояндагон хабар доданд.

Иброз гардид, ки мо дар шароити буҳрони сегонаи хавфи экологӣ — тағйирёбии иқлим, коҳишёбии гуногунии биологӣ ва ифлосшавии муҳити зист зиндагӣ дорем. Барои шароити Ҷумҳурии Тоҷикистон, ки мамлакати аз лиҳози таъсири тағйирёбии иқлим осебпазир арзёбӣ гардидааст, масъалаи устуворӣ ба ин гуна буҳрони экологӣ ба авлавияти стратегӣ табдил ёфтааст.

Афзоиши аҳолӣ, рушди саноат, васеъшавии сохтмон ва зиёдшавии воситаҳои нақлиёт боис гардидааст, ки ҳаҷми партовҳо босуръат афзоиш ёбад.

Рушди  иқтисоди «сабз» ва иқтисоди даврӣ дар Ҷумҳурии Тоҷикистон самтҳои муҳимми сиёсати иқтисодӣ ва экологӣ маҳсуб шуда, бо мақсади расидан ба рушди устувор ва коҳиш додани таъсири манфии иқтисод ба муҳити зист татбиқ мешаванд.

АКС: Маҷлиси намояндагони Маҷлиси Олии Ҷумҳурии Тоҷикистон