Дар Душанбе форуми минтақавӣ-ҷаласаи роҳбарони сохторҳои ҳолатҳои фавқулода аз давлатҳои Осиёи Марказӣ идома дорад

ДУШАНБЕ, 17.10.2025. /АМИТ «Ховар»/. 16 октябр дар шаҳри Душанбе таҳти раёсати Ҷумҳурии Тоҷикистон  форуми минтақавӣ-ҷаласаи роҳбарони сохторҳои ҳолатҳои фавқулода аз давлатҳои Осиёи Марказӣ  оғоз гардид. Дар ин хусус АМИТ «Ховар» бо истинод ба Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар медиҳад.

Ҷаласа бо ташаббуси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон дар ҳамкорӣ бо Маркази минтақавии ҳамоҳангсозии ҳолатҳои фавқулода ва паст кардани хатари офатҳои табиӣ (CESDRR), Барномаи Рушди Созмони Милали Муттаҳид (UNDP), Ҷамъияти Олмон оид ба ҳамкории байналмилалӣ (GIZ) ва Дафтари Созмони Милали Муттаҳид оид ба паст кардани хатари офатҳои табиӣ (UNDRR) идома дорад.

Дар доираи барномаи форум,  ҳайатҳои кишварҳои иштироккунанда  боғи ангури шаҳри Турсунзодаро тамошо намуданд.

Ин ҳамоиш ҳамчун минбари табодули таҷриба, таҳкими ҳамкорӣ ва ҳамоҳангии ниҳодҳои вокуниш ба ҳолатҳои изтирорӣ дар минтақа барои беҳбуди омодагӣ ба офатҳои табиӣ ва коҳиш додани таъсири офатҳои табиӣ хизмат мекунад.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон