РУШДИ САЙЁҲӢ. Имсол ба вилояти Хатлон беш аз 900 ҳазор сайёҳ ташриф овардааст

ДУШАНБЕ, 23.10.2025. /АМИТ «Ховар»/. Дар нуҳ моҳи соли равон ба вилояти Хатлон 928 ҳазору 319 нафар сайёҳони дохилию хориҷӣ ворид гардидаанд, ки аз ин шумора 832 ҳазору 613 нафари онро сайёҳони дохилӣ ва 95 ҳазору 706 нафари онро сайёҳони хориҷӣ ташкил медиҳанд. Дар ин хусус ба АМИТ «Ховар» аз шуъбаи рушди сайёҳии Мақомоти иҷроияи ҳокимияти давлатии вилояти Хатлон хабар доданд.

Дар айни замон дар ҳудуди шаҳру ноҳияҳои вилоят 940 ёдгории таърихию фарҳангӣ, 270 истироҳатгоҳу осоишгоҳ, 121 меҳмонхона, 143 мавзеи табиӣ, 45 осорхона, 115 зиёратгоҳ ва даҳҳо тарабхона, чойхона, марказҳои иттилоотӣ ва дигар инфрасохтори зарурии сайёҳӣ фаъолият доранд.

Ҳамасола манзараҳои табиати дилфиреб, кӯҳҳои сарбафалаккашидаи Хатлонзамин ва рӯду чашмаҳои зулолу шифобахши ин минтақаро садҳо нафар  сайёҳон тамошо менамоянд.

Вилояти Хатлон бо назардошти мавҷудияти захираҳои бойи табиӣ, таърихию фарҳангӣ ва экологӣ-сайёҳӣ метавонад яке аз самтҳои афзалиятноки иқтисодиёти минтақа гардад.
Таҳлилҳо нишон медиҳанд, ки ҳамасола теъдоди сайёҳони хориҷие, ки барои шинос шудан бо мавзеъҳои сайёҳии вилояти Хатлон ба мамлакат ворид мешаванд, меафзояд.

Хатлон ҳамчунин макони фарҳангу ҳунар буда, байни мардуми ин минтақа ҳунарҳои чакандӯзию гулдӯзӣ, чӯбтарошию заргарӣ рушд намудаанд. Маҳсули дастони ҳунармандони чирадасти Хатлонзамин чандин намоишгоҳу фестивалҳои сатҳи ҷаҳониро бо ҷилои фарҳанги пурғановат оро додааст.

АКС: Шуъбаи рушди сайёҳии Мақомоти иҷроияи ҳокимияти давлатии вилояти Хатлон