Файзалӣ Идизода бо Сафири Озарбойҷон дар Тоҷикистон мулоқот намуд

ДУШАНБЕ, 24.10.2025 /АМИТ «Ховар»/. Имрӯз Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода  бо Сафири Фавқулода ва Мухтори Ҷумҳурии Озарбойҷон дар Ҷумҳурии Тоҷикистон Алимирзамин Гаввам оглу Аскеров мулоқот намуд. Дар ин хусус АМИТ «Ховар» бо истинод ба Маҷлиси намояндагон хабар медиҳад.

— Комёбиҳои бузургу беназире, ки дар муносибатҳои мо ба даст омадаанд, — изҳор намуд Файзалӣ Идизода,- самараи ҷаҳду талош, дӯстии самимӣ ва иродаи сиёсӣ байни Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Президенти Ҷумҳурии Озарбойҷон Илҳом Алиев мебошанд.

Гуфта шуд, ки дар ин замина бояд нақш ва аҳаммияти ҳуҷҷатҳои асосӣ — Эъломияи шарикии стратегӣ байни Ҷумҳурии Тоҷикистон ва Ҷумҳурии Озарбойҷон, ки зимни сафари давлатии Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Озарбойҷон 23 майи соли 2024 имзо гардида, ба рушди муносибатҳои  кишварҳоямон  дар дурнамои дарозмуддат такони иловагӣ мебахшанд, бояд иброз намуд.

Таъкид гардид, ки вакилони парламентҳои ҳарду давлат метавонанд дар рушди муносибатҳои иқтисодӣ, тиҷоратӣ, гуманитарӣ, фарҳангӣ, қонунгузорӣ ва дигар соҳаҳо саҳми арзанда гузоранд. Аз ин рӯ, табодули таҷрибаи вакилони ҳарду давлат ба нафъи тарафҳо буда, ба пешрафти фаъолият дар ҳама соҳаҳо мусоидат менамояд.

АКС: Маҷлиси намояндагони Маҷлиси Олии Ҷумҳурии Тоҷикистон