МЕҲРГОН ОМАД, МУБОРАК, МЕҲРГОН ОМАД! Пагоҳ дар Душанбе Иди Меҳргон бо шукуҳу шаҳомати хосса таҷлил мегардад
ДУШАНБЕ, 18.10.2025. /АМИТ «Ховар»/. Пагоҳ дар Боғи фарҳангию фароғатии ба номи Абулқосим Фирдавсии пойтахт ҷашни фасли заррини тирамоҳ, ҷашни деҳқонон ва айёми ҷамъ овардани ҳосили кишоварзию боғдорӣ, рамзи баракату фаровонӣ ва файзи дастархони мардум- Иди Меҳргон ва Фестивал-намоиши маҳсулот ва техникаи кишоварзӣ бо шукуҳу шаҳомати хосса таҷлил мегардад, иттилоъ медиҳад АМИТ «Ховар».
Ҳамчунин дар ин рӯз «Фестивали занбӯрпарварон, намоиш ва фурӯши асал», «Иди себ ва ангур», «Оши палав, намоиш ва фурӯши шолӣ ва биринҷ» ва «Иди тарбуз, харбуза ва каду» баргузор карда мешаванд.
Дар ҷашни Меҳргон ва дигар идҳои кишоварзӣ деҳқонон аз тамоми гӯшаю канори ҷумҳурӣ дастранҷи худ – маҳсулоти кишоварзӣ, аз қабили навъҳои гуногуни биринҷу шолӣ, себу ангур, асал, сабзавот ва меваҷотро, ки хоси ин ҷашн мебошанд, ба намоиш мегузоранд.
Пешвои миллат муҳтарам Эмомалӣ Раҳмон дар яке аз суханрониҳояшон иброз доштаанд, ки «Меҳргон дар таърихи мардуми фарҳангпарвари мо пас аз Наврӯзи оламафрӯз бузургтарин ҷашне аст, ки омилу заминаҳои муҳими табиӣ, иҷтимоиву иқтисодӣ ва фарҳангиву маънавӣ онро то замони мо расонидаанд. Меҳргон мисли Наврӯз таҷассумгари суннатҳои неки инсонӣ ва инъикоскунандаи заҳмати марди деҳқону дастархони мардум мебошад».
Ҷашни Меҳргон яке аз идҳои қадимии мардуми ориёинажод буда, маҳз ба туфайли соҳибистиқлолии Тоҷикистон ва талошҳои пайвастаи Пешвои миллат аз нав эҳё гардид ва тибқи Қонуни Ҷумҳурии Тоҷикистон «Дар бораи рӯзҳои ид» дар қатори дигар ҷашну идҳо ҳамчун иди миллӣ дар мамлакатамон таҷлил карда мешавад.
Тавре Шоири халқии Тоҷикистон, ходими адабии АМИТ «Ховар» Камол Насрулло гуфтааст:
Рӯд бо савту навое дар равон омад!
Ҳар гиёҳе бо муҳаббат бар забон омад!
Пайки хуш бар меҳани озодагон омад!
Меҳргон омад, муборак, Меҳргон омад!
Дар ин ҷашнгоҳ кишоварзони мамлакат бо манора ва ороиши махсус навъҳои гуногуни зироат, меваю сабзавот ва полезиҳо, аз қабили харбузаву тарбуз, ангур, хурмою анор ва дигар навъи маҳсулоти кишоварзиро пешниҳод менамоянд.
Дар фарҷоми Иди Меҳргон аз ҷониби Вазорати кишоварзии Тоҷикистон ба кишоварзони фаъоли ҷумҳурӣ барои пешниҳоди маҳсулоти хушсифат ва саҳмгузорӣ дар таъмини амнияти озуқаворӣ аз рӯи номинатсияҳо Диплом, Сипоснома ва туҳфаҳои хотиравӣ тақдим карда мешаванд.
Фирӯза ДАВЛАТЗОДА,
АМИТ «Ховар»
АКС: АМИТ «Ховар»
Дар Осорхонаи миллии Тоҷикистон беш аз 800 бозёфти нодири таърихӣ ба намоиш гузошта шудааст
РӮЗИ БУЗУРГДОШТИ САЪДИИ ШЕРОЗӢ. Осори безаволи шоир дар тарбияи ахлоқӣ ва маънавии ҷомеа нақши муҳим дорад
Филми ҳунарии «Моҳӣ дар шаст» дар кинофестивали 48-уми байналмилалии Москва намоиш дода шуд
Дар Душанбе бахшида ба Рӯзи байналмилалии ҳифзи ёдгориҳои таърихию фарҳангӣ ҳамоиш баргузор гардид
«ЯК МАТОВУ САД РАНГ». Дар Кӯлоб даври шаҳрии фестивал-озмун баргузор гардид
РӮЗИ БАЙНАЛМИЛАЛИИ ҲИФЗ ВА НИГОҲДОРИИ ЁДГОРИҲО ВА ҶОЙҲОИ ТАЪРИХӢ. Қалъаи Ҳисор таърихи зиёда аз 3000-сола дорад
ТАЪРИХИ ВАТАНРО МЕОМӮЗЕМ! Имрӯз дар мавзеъҳои таърихии мамлакат Рӯзи дарҳои боз гузаронида мешавад
Ҷаласаи Комиссияи Озмуни ҷумҳуриявии «Донандаи беҳтарини асарҳои Пешвои миллат» доир гардид
«РАҚС МОРО МУТТАҲИД МЕНАМОЯД». Таҳти чунин унвон дар Тоҷикистон фестивали байналмилалӣ доир мегардад
Дар ноҳияи Айнӣ бахшида ба зодрӯзи Қаҳрамони Тоҷикистон Садриддин Айнӣ ҳамоиши илмӣ-адабӣ баргузор гардид
ИМРӮЗ — ЗОДРӮЗИ САДРИДДИН АЙНӢ. Осори Устод Айнӣ ҳамчун сарчашмаи муҳими илмӣ ва фарҳангӣ истифода мешавад
АЙНИШИНОСЕ ПУРТАЛОШ АЗ КИШВАРИ ҲАМЗАБОН. Эҳдо ба зодрӯзи сардафтари адабиёти муосири тоҷик Садриддин Айнӣ
