«ОМӮЗГОР — ЧАРОҒИ МАЪРИФАТ ВА СУТУНИ ҶОМЕА». Дар шаҳри Кӯлоб Рӯзи омӯзгоронро таҷлил намуданд

ДУШАНБЕ, 04.10.2025. /АМИТ «Ховар»/. Дар Донишгоҳи давлатии Кӯлоб ба номи Абуабдуллоҳи Рӯдакӣ ба муносибати Рӯзи омӯзгорон, ки ҳамасола якшанбеи якуми моҳи октябр таҷлил карда мешавад, таҳти унвони «Технологияи баланд бардоштани мақому манзалат ва уҳдадориҳои омӯзгор» конференсияи ҷумҳуриявии илмӣ-амалӣ баргузор гардид.

Тавре аз ин донишгоҳ ба АМИТ «Ховар» иттилоъ доданд, Ҳукумати Тоҷикистон барои таъмини  рушди устувори соҳаи маориф маблағгузории ин соҳаро сол ба сол зиёд намуда, барои кормандони соҳа ва омӯзгорону донишҷӯён шароити хубу муосири кору зиндагӣ  ва таълимро пайваста фароҳам меорад.

Ба таъкиди иштирокчиён, ҳадафи асосии давлат ва Ҳукумати мамлакат аз таваҷҷуҳи хосса ба соҳаи илму маориф он аст, ки сифати таҳсил дар муассисаҳои таълимӣ баланд бардошта шуда, насли ояндасози мамлкат бо фаро гирифтани илму дониши муосир барои рушди минбаъдаи иҷтимоию иқтисодии Ватан, пешрафти давлат ва ҳифзи сарзамини аҷдодӣ омода карда шавад.

Ректори донишгоҳ Мунир Сафарзода иброз намуд, ки ҷаҳони имрӯз дар марҳилаи нави таърихӣ қарор дорад. Тағйирёбии босуръати муносибатҳои сиёсӣ, иқтисодӣ ва иҷтимоӣ дар заминаи равандҳои амиқи ҷаҳонишавӣ на танҳо ҷаҳонбинии ҷомеаро дигар месозад, балки ниёз ба рушди неруи инсонӣ ва сатҳи маърифати ҷомеаро боз ҳам амиқтар менамояд. Дар чунин шароит нақши омӯзгор чун роҳнамо ва роҳбари фикрию ахлоқии наслҳои ояндасоз беш аз ҳар вақти дигар зарур ва сарнавиштсоз гардидааст.

Дар конференсия иброз гардид, ки омӯзгорӣ касби пуршарафу меҳварӣ буда, имрӯз ҷомеаи башарӣ бештар аз ҳар вақти дигар ба неруи маънавии омӯзгор ниёз дорад.

АКС: Донишгоҳи давлатии Кӯлоб ба номи Абуабдуллоҳи Рӯдакӣ