Тоҷикистон ва Узбекистон дар самтҳои рушди ҳукумати электронӣ, таҳияи платформаҳо ва ҳамгироии рақамӣ ба мувофиқа расиданд

ДУШАНБЕ, 18.10.2025 /АМИТ «Ховар»/. Агентии инноватсия ва технологияҳои рақамии назди Президенти Ҷумҳурии Тоҷикистон ва Вазорати технологияҳои рақамии Ҷумҳурии Узбекистон омодагии худро барои таҳия ва татбиқи лоиҳаҳои муштарак дар самтҳои ҳукумати электронӣ, таҳияи платформаҳои рақамӣ, рушди иқтидори кадрҳои соҳа ва дастгирии стартапҳо изҳор намуданд. Дар ин хусус АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон иттилоъ медиҳад.

Ин тасмим дар доираи мулоқоти директори Агентии инноватсия ва технологияҳои рақамии назди Президенти Ҷумҳурии Тоҷикистон Хуршед Мирзо ва Вазири технологияҳои рақамии Ҷумҳурии Узбекистон Шерзод Шерматов, ки дар доираи форумҳои байналмилалии сармоягузории «Dushanbe invest – 2025» ва «Digital Tajikistan – 2025» баргузор гардид, гирифта шуд.

Ҷонибҳо масъалаҳои марбут ба рушди ҳамкории дуҷониба дар самти рақамисозии иқтисод, таҳкими ҳамгироии рақамӣ, мубодилаи таҷриба ва ҷорӣ намудани ҳалли инноватсионии муштаракро мавриди баррасӣ қарор доданд.

Ҳарду ҷониб омодагии худро барои таҳия ва татбиқи лоиҳаҳои муштарак дар самтҳои ҳукумати электронӣ, таҳияи платформаҳои рақамӣ, рушди иқтидори кадрҳои соҳа ва дастгирии стартапҳо изҳор намуданд.

Ин мулоқот марҳилаи муҳими ҳамкорӣ байни Тоҷикистон ва Узбекистон дар самти технологияҳои рақамӣ ва инноватсия арзёбӣ гардида, ба таҳкими робитаҳои дуҷониба ва рушди экосистемаи рақамии минтақавӣ мусоидат менамояд.

Дар фарҷом ҷонибҳо барои пайгирии масъалаҳои баррасишуда ва ба роҳ мондани тадбирҳои амалӣ ба мувофиқа расиданд.

АКС: Агентии инноватсия ва технологияҳои рақамии назди Президенти Ҷумҳурии Тоҷикистон