Байни Донишгоҳи байналмилалии забонҳои хориҷии Тоҷикистон ва Донишгоҳи байналмилалии Остонаи Қазоқистон созишнома ба имзо расид

ДУШАНБЕ, 19.11.2025 /АМИТ «Ховар»/. Байни Донишгоҳи байналмилалии забонҳои хориҷии Тоҷикистон ба номи Сотим Улуғзода ва Донишгоҳи байналмилалии Остонаи Ҷумҳурии Қазоқистон созишномаи нави ҳамкорӣ ба имзо расид.

Тавре ба АМИТ «Ховар» аз Донишгоҳи байналмилалии забонҳои хориҷии Тоҷикистон хабар доданд, созишнома бо мақсади пойдор мондани робитаҳои дӯстона ва ҳамкорӣ дар самти таълим ба имзо расонида шуд.

Зимни вохӯрӣ ректори Донишгоҳи байналмилалии забонҳои хориҷии Тоҷикистон Жило Гулназарзода ва муовини якуми ректори Донишгоҳи байналмилалии Остонаи Ҷумҳурии Қазоқистон Анар Мирзагалиева масъалаҳои рушди ҳамкории илмӣ ва академӣ, аз ҷумла ба роҳ мондани барномаҳои муштараки таълимӣ, табодули таҷриба ва иштироки фаъолонаи омӯзгорону донишҷӯёнро дар лоиҳаҳои байналмилалӣ барои боло бурдани сифати таҳсил ва тавсеаи имконоти ду ҷониб баррасӣ намуданд.

Таъкид шуд, ки густариш додани робитаҳои илмӣ, татбиқи барномаҳои муштараки таълимӣ ва мубодилаи таҷрибаи педагогӣ барои боло бурдани сатҳи омодагии мутахассисони ҷавон ва тақвияти нуфузи муассисаҳои таҳсилоти олӣ дар арсаи байналмилалӣ заминаи муосид фароҳам меорад.

АКС: Донишгоҳи байналмилалии забонҳои хориҷии Тоҷикистон ба номи Сотим Улуғзода