Дар Донишгоҳи давлатии Кӯлоб Рӯзи Парчами давлатиро ҷашн гирифтанд

ДУШАНБЕ, 23.11.2024. /АМИТ «Ховар»/. 21 ноябр дар Донишгоҳи давлатии Кӯлоб ба номи Абуабдуллоҳи Рӯдакӣ бахшида ба Рӯзи Парчами давлатии Ҷумҳурии Тоҷикистон таҳти унвони «Парчами давлатӣ — рамзи истиқлолият ва давлатдории миллӣ» чорабинии бошукӯҳи фарҳангӣ-фароғатӣ баргузор гардид.

Тавре ба АМИТ «Ховар» аз ин донишкада хабар доданд, чорабинӣ бо роҳпаймоии осоиштаи ҳайати бисёрҳазорнафараи донишгоҳ ҳамчун рамзи эҳтиром ва арҷгузорӣ ба муқаддасоти миллӣ ва рамзи давлатдориву ойини худшиносӣ-Парчами давлатии Ҷумҳурии Тоҷикистон оғоз гардид.

Зимни ҳамоиши тантанавӣ иброз гардид, ки Парчами давлатии Ҷумҳурии Тоҷикистон, ки ранги сурх дар он рамзи истиқлолу озодӣ, сафед нишонаи сулҳу оромӣ ва сабз ифодаи ободию сарсабзии зиндагӣ мебошад, ҳамчунин тоҷи соҳибдавлатӣ бо ҳафт ситораи дурахшон таҷассумгари тамаддуни оламгир, фарҳанги ғании давлатдорӣ ва масири пурифтихори ватанпарастии миллати мо ба шумор меравад. Ин рамзи муқаддас дар худ қаҳрамониҳои фарзандони сарсупурда ва ормонҳои мардуми шарафманди мамлакатро ифода менамояд.

Дар ҳамоиш бо дарназардошти фаъолияти муназзаму густурда ва саҳми арзанда дар пешбурди корҳои таълимӣ, тарбиявӣ ва ташкилӣ, ҳамчунин иштироки фаъолона дар барномаҳои телевизионӣ гурӯҳе аз кормандони донишгоҳ бо «Сипоснома»-и Муассисаи давлатии Телевизиони Кӯлоб қадрдонӣ гардиданд.

Суруду таронаҳои ансамбли «Наво»-и донишгоҳ, ки тараннумгари сулҳу ваҳдат, дӯстӣ, меҳанпарастӣ, бузургии сарзамини аҷдодӣ ва арҷгузорӣ ба рамзҳои давлатӣ — хоса Парчами давлатии Ҷумҳурии Тоҷикистон буданд, ба маҳфил зебоиву таровати бештар зам намуд.

АКС: Донишгоҳи давлатии Кӯлоб ба номи Абуабдуллоҳи Рӯдакӣ