Дар Душанбе густариши робитаҳои байнипарламентии Тоҷикистону Фаронса баррасӣ гардид

ДУШАНБЕ, 18.11.2025 /АМИТ «Ховар»/. Имрӯз муовини Раиси Маҷлиси намояндагони Маҷлиси Олии Ҷумҳурии Тоҷикистон  Мавсума Муинӣ  бо Сафири Фавқулода ва Мухтори Ҷумҳурии Фаронса дар Ҷумҳурии Тоҷикистон хонум Элза Пинёл вохӯрӣ намуд, ки зимни он ҷонибҳо густариши ҳамкории байнипарламентиро мавриди баррасӣ қарор доданд.

Тавре ба АМИТ «Ховар» аз Маҷлиси намояндагон хабар доданд, дар вохӯрӣ иброз гардид, ки қисмати ҷудонашавандаи робитаҳои Тоҷикистон ва Фаронсаро ҳамкории байнипарламентӣ ташкил медиҳад. Бо мақсади танзими ин раванд гурӯҳи дӯстӣ ва ҳамкорӣ байни Маҷлиси намояндагони Маҷлиси Олии Ҷумҳурии Тоҷикистон ва Маҷлиси миллии Парламенти Ҷумҳурии Фаронса таъсис ёфтааст.          Ин сохтор дар мубодилаи таҷрибаи қонунгузорӣ, рушди муколамаи байнипарламентӣ ва таҳкими эътимоди мутақобил нақши  муҳим мебозад.

Таъкид гардид, ки ҳамкории судманд байни Тоҷикистону Фаронса дар доираи Созмони Милали Муттаҳид, ЮНЕСКО ва дигар созмонҳои байналмилалӣ самтҳои афзалиятнок — дипломатияи об, тағйирёбии иқлим, рушди устувор ва ҳифзи муҳити зистро фаро мегирад.

АКС: Маҷлиси намояндагони Маҷлиси Олии Ҷумҳурии Тоҷикистон