Дар ҶСК «Шабакаҳои тақсимоти барқ» дар шаҳри Душанбе филиали кафедраи электроэнергетикаи Коллеҷи техникӣ таъсис дода шуд

ДУШАНБЕ, 20.11.2025 /АМИТ «Ховар»/. Дар Ҷамъияти саҳомии кушодаи «Шабакаҳои тақсимоти барқ» дар шаҳри Душанбе филиали кафедраи электроэнергетикаи факултети энергетика ва нақлиёти Коллеҷи техникии шаҳри Душанбе ифтитоҳ гардид. Дар ин хусус АМИТ «Ховар» бо истинод ба Коллеҷи техникӣ хабар медиҳад.

Филиали кафедра дар асоси шартномаи дутарафаи ҳамкории Коллеҷи техникӣ ва Ҷамъияти саҳомии кушодаи «Шабакаҳои тақсимоти барқ» барои гузаронидани дарсҳои амалӣ ва таҷрибаомӯзии таълимӣ-шиносоӣ, истеҳсолӣ ва пешаздипломии донишҷӯёни шуъбаи рӯзонаи ихтисосҳои соҳаи энергетика таъсис дода шуд.

Минбаъд донишҷӯёни факултети энергетика ва нақлиёт барои гузаронидани дарсҳои сайёр, амалӣ ва озмоишӣ ва ҳама гуна таҷрибаомӯзиҳо дар низоми таълими дуалӣ ба филиал ҷалб карда мешаванд.

Дар филиали кафедра синфхонаи тахассусии муҷаҳҳаз бо тамоми воситаҳои методии техникӣ, либоси махсуси таълимӣ ва асбоби аёнӣ ташкил карда шудааст, ки ба таълими амалии донишҷӯён мусоидат менамояд.

АКС: Коллеҷи техникии шаҳри Душанбе