Ба омӯзгорону донишҷӯёни Коллеҷи омӯзгории шаҳри Хуҷанд муҳтавои Паёми Президенти Тоҷикистон расонида шуд

ДУШАНБЕ, 30.12.2025 /АМИТ «Ховар»/. Бо мақсади расонидани муҳтавои Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон дар Коллеҷи омӯзгории шаҳри Хуҷанд вохӯрии вакилони Маҷлиси намояндагони Маҷлиси Олии Ҷумҳурии Тоҷикистон бо омӯзгорону донишҷӯён, кормандони соҳаи маориф ва сокинон баргузор шуд.

Тавре АМИТ «Ховар» бо истинод ба Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон хабар медиҳад, дар вохӯрӣ муовини Раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ ва вакили Маҷлиси намояндагон Ғулом Ҳалимзода сухан намуданд.

Масъулин нуктаҳои асосӣ ва самтҳои афзалиятноки Паёми Президенти Ҷумҳурии Тоҷикистон ба Маҷлиси Олиро мавриди таҳлил қарор дода, ба масъалаҳои рушди соҳаи маориф, баланд бардоштани сатҳи зиндагии аҳолӣ, таъмини шуғли аҳолӣ, дастгирии ҷавонон ва занон, инчунин таҳкими суботи иҷтимоӣ таваҷҷуҳи махсус зоҳир намуданд.

Иштирокчиёни мулоқот таъкид доштанд, ки татбиқи ҳадафҳои стратегӣ ва дастуру супоришҳои Сарвари давлат бо саҳми фаъоли ҳар шаҳрванд имконпазир буда, омӯзгорон дар тарбияи насли наврас дар руҳияи ватандӯстӣ, худшиносии миллӣ ва эҳтиром ба арзишҳои давлатдорӣ нақши калидӣ доранд.

Дар фарҷом сокинон ва омӯзгорон ба саволҳо посух гирифта, барои ташкили чунин мулоқоти судманд изҳори қаноатмандӣ намуданд.

АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон