Дар Душанбе 24 нуқтаи савдо дар маконҳои номуайян бартараф карда шуд

ДУШАНБЕ, 18.12.2025 /АМИТ «Ховар»/. Дар атрофи бозори «Сафариён» – и шаҳри Душанбе 24 нуқтаи савдо, ки дар маконҳои номуайян фаъолият доштанд, бартараф карда шуданд. Дар ин хусус ба АМИТ «Ховар» аз Раёсати Вазорати корҳои дохилӣ дар шаҳри душанбе хабар доданд.

Иттилоъ дода шуд, ки ин санҷиш бо мақсади таъмини риояи қоидаҳои санитарию гигиенӣ ва пешгирии монеагузорӣ ба ҳаракати шаҳрвандон дар роҳ анҷом дода шуд.

Зимни санҷиш муайян гардид, ки як гурӯҳ шаҳрвандон бар хилофи қоидаҳои шаҳрнишинӣ дар роҳрави пиёдагардон ва даромадгоҳи бозор худсарона нуқтаи савдо ташкил намуда, бо ин амалашон на танҳо талаботи санитариро вайрон, балки барои ворид гардидани шаҳрвандон ба бозор низ монеа эҷод намудаанд.

Мақомот шаҳрвандонро даъват менамояд, ки маҳсулоти хӯроквориро танҳо дар ҷойҳои махсуси муайяншуда ва бо риояи пурраи қоидаҳои санитарию гигиенӣ фурӯшанд. Ҳамзамон нисбат ба саломатии аҳолӣ ва талаботи қонунгузории Ҷумҳурии Тоҷикистон бетафовут набошанд.

АКС: Раёсати Вазорати корҳои дохилӣ дар шаҳри Душанбе