Дар Риёз маблағгузории татбиқи лоиҳаҳои афзалиятноки Тоҷикистон баррасӣ гардид

ДУШАНБЕ, 10.12.2025 /АМИТ «Ховар»/. 9 декабр дар ҳошияи Конфронси молиявии рушд дар шаҳри Риёзи Подшоҳии Арабистони Саудӣ оид ба ҷалби маблағҳо барои татбиқи лоиҳаҳои афзалиятноки Ҷумҳурии Тоҷикистон, аз ҷумла сохтмони иншооти Неругоҳи барқи обии «Роғун» ва инфрасохтори иҷтимоӣ ҳамоиш баргузор гардид.

Дар ҳамоиш намояндагони масъули Бонки исломии рушд, Фонди Қатар оид ба рушд, Фонди Кувайтии рушди иқтисодиёти Араб, Фонди Саудии Рушд, Фонди ОПЕК оид ба рушди байналмилалӣ, Фонди Абузабӣ оид ба рушд ва дигар созмонҳо иштирок доштанд.

Вазири молияи Ҷумҳурии Тоҷикистон Файзиддин Қаҳҳорзода доир ба раванди маблағгузории сохтмони иншооти Неругоҳи барқи обии «Роғун», ҷараёни корҳои сохтмонӣ, иштироки сармоягузорон дар татбиқи лоиҳа ва дигар ҳамкории Ҳукумати Ҷумҳурии Тоҷикистон доир ба татбиқи ин лоиҳа маълумоти муфассал манзур намуд. Ҳамзамон оид ба корҳои сохтмонӣ дар неругоҳ гузориши видеоӣ манзур карда шуд.

Масъулини созмонҳои молиявӣ бо назардошти аҳамияти минтақавии Неругоҳи барқи обии «Роғун» даъват карда шуданд, ки барои идомаи маблағгузории ин иншоот мусоидат намоянд.

Масъули Бонки исломии рушд, Фонди Қатар оид ба рушд, Фонди Кувайтии рушди иқтисодиёти Араб, Фонди Саудии Рушд, Фонди ОПЕК оид ба рушди байналмилалӣ, Фонди Абузабӣ оид ба рушд барои дастгирӣ ва маблағгузории ин иншооти муҳими минтақавӣ изҳори омодагӣ намуданд.

Инчунин дар доираи баргузории ин чорабинӣ мулоқоти Вазири молияи ҷумҳурӣ Файзиддин Қаҳҳорзода бо Директори минтақавии Фонди Абузабӣ оид ба рушд барои кишварҳои Осиё Абдулло Алмансурӣ баргузор шуд. Абдулло Алмансурӣ омодагии фондро барои маблағгузории идомаи корҳои сохтмони иншооти Неругоҳи барқи обии «Роғун» баён дошт.

Ҷонибҳо ба мувофиқа омаданд, ки масъалаҳои ҳамкорӣ ва иштироки Фонди Абузабӣ оид ба рушд дар маблағгузории иншооти барои ҷумҳурӣ афзалиятнок моҳҳои наздик тавассути баргузории вохӯриҳои алоҳида мушаххас ва матраҳ карда мешаванд.

АКС: Вазорати молияи Ҷумҳурии Тоҷикистон